ក្រុមព្រះខ័នរាជស្វាយរៀង នឹងត្រូវទទួលរងការផាកពិន័យជាប្រាក់រហូតដល់ ១,០០០,០០០ ដុល្លារអាមេរិក រួមទាំងទណ្ឌកម្មមួយចំនួនទៀត បើសិនក្លិបតំណាងឱ្យកម្ពុជាមួយនេះ មិនព្រមប្រកួតជាមួយ Bangkok United FC របស់ថៃ នៅលើទឹកដីវៀតណាម ទៅតាមការរៀបចំរបស់សហព័ន្ធកីឡាបាល់ទាត់អាស៊ាន (AFF) ទេនោះ។
ក្លិបព្រះខ័នរាជស្វាយរៀង ទើបតែបានចេញសេចក្តីថ្លែងការណ៍ផ្លូវការចំពោះបញ្ហានេះ បន្ទាប់ពីពួកគេ បានរួមគ្នាបង្កើតប្រវត្តិសាស្រ្តជាលើកទី២ ចំពោះការដណ្តើមបានកៅអីឡើងទៅប្រកួតវគ្គផ្តាច់ព្រ័ត្រនៃពានរង្វាន់ AFC Challenge League 2025/26 ជាលើកទី២ ក្រោយក្រុមស្វាយរៀង បានយកឈ្នះក្រុមម្ចាស់ផ្ទះ Manila Digger FC របស់ហ្វីលីពីន ៣-០ ក្នុងការប្រកួតជើងទី២ កាលពីយប់ថ្ងៃទី១៦ ខែមេសា ខណៈការប្រកួតជើងទី១ នៅពហុកីឡដ្ឋានជាតិមរតកតេជោ ១-១ កាលពីថ្ងៃទី៩ ខែមេសា។
នៅក្នុងសេចក្តីថ្លែងការណ៍នេះ ក្លិបព្រះខ័នរាជស្វាយរៀង បានបង្ហាញការសោកស្តាយខ្លាំង ដែលការប្រកួតពានរង្វាន់ Shopee Cup ជាមួយក្រុម Bangkok United FC របស់ថៃ មិនអាចធ្វើទៅលើទឹកដីនកម្ពុជា ទៅតាមការគម្រោងនៃការរៀបចំ កាលពីដំបូង ព្រោះក្រុម Bangkok United FC មិនព្រមមកប្រកួតនៅលើទឹកដីកម្ពុជា ហើយចុងក្រោយ AFF បានសម្រេចលើកយកការប្រកួតនេះ ត្រូវធ្វើឡើងនៅទីក្រុងហាណូយ ប្រទេសវៀតណាម នាថ្ងៃទី២២ ខែមេសាខាងមុខនេះ។
ក្លិបព្រះខ័នរាជស្វាយរៀង បានបញ្ជាក់នៅក្នុងសេចក្តីថ្លែងការណ៍របស់ខ្លួនបែបនេះថា៖ «ជាដំបូង យើងយល់ច្បាស់ពីការខកចិត្ត និងអារម្មណ៍ជុំវិញស្ថានភាពមួយនេះ។ ខ្ញុំចង់បញ្ជាក់ឱ្យបានច្បាស់ថា ការសម្រេចចិត្តនេះ មិនមែនធ្វើឡើងដោយក្លិបនោះទេ។ ក្លិបរបស់យើងបានខិតខំប្រឹងប្រែងអស់ពីសមត្ថភាព ដើម្បីរៀបចំការប្រកួតនេះ នៅក្នុងប្រទេសកម្ពុជា»។
ក្លិបបានបន្ថែមថា ជាការពិតណាស់ ចាប់តាំងពីខែធ្នូ ឆ្នាំ២០២៥ មក យើងបានផ្តល់នូវផែនការពេញលេញ និងការធានាផ្សេងៗ ដើម្បីធានាថា ការប្រកួត អាចត្រូវបានរៀបចំឡើងដោយសុវត្ថិភាព និងជោគជ័យ ដូចដែលយើងធ្លាប់បានធ្វើជាច្រើននៅពេលទទួលស្វាគមន៍ក្រុមអន្តរជាតិនានា។
ជាច្រើនដងកន្លងមកនេះ យើងក៏បានលើកឡើងពីកង្វល់អំពីផលប៉ះពាល់ផ្នែកកីឡានៃការសម្រេចចិត្តនេះ រួមមានការ ធ្វើដំណើរអន្តរជាតិបន្ថែម និងកាលវិភាគប្រកួតដ៏មមាញឹកដែលមានផលប៉ះពាល់ដល់ការសម្រាកការពារសុខុមាលភាព កីឡាករ និងសមត្ថភាពរបស់យើងក្នុងការដាក់កីឡាករខ្លាំងបំផុតចូលលេងក្នុងគ្រប់កម្មវិធីប្រកួត។
ក្លិបបានបញ្ជាក់ថា៖ «ទោះបីជាមានការខិតខំប្រឹងប្រែងទាំងនេះក៏ដោយ ក៏ការសម្រេចចិត្តជាចុងក្រោយនៅតែត្រូវលេងនៅទឹកដីកណ្ដាល (ប្រទេសវៀតណាម) ហើយក្នុងនាមជាក្លិបដែលចូលរួមក្នុងកម្មវិធីប្រកួតនេះ យើងតម្រូវឱ្យគោរពតាមបទប្បញ្ញត្តិផ្លូវការ។ ប្រសិនបើយើងបដិសេធមិន ចូលរួមប្រកួត វាអាចនឹងមានផលវិបាកធ្ងន់ធ្ងរដល់ក្លិប រួមមានការផាកពិន័យជាប្រាក់រហូតដល់ ១,០០០,០០០ ដុល្លារអាមេរិក ការហាមឃាត់មិនឱ្យចូលរួមការប្រកួតផ្សេងៗរហូតដល់ ២ ឆ្នាំ»។
បន្ថែមលើនេះ ក្លិបព្រះខ័នរាជស្វាយរៀង ក៏ទទួលរងការដាក់ទណ្ឌកម្មបន្ថែមផ្សេងៗទៀតផងដែរ។ ក្លិបបានបញ្ជាក់ថា៖ «ផលវិបាកទាំងនេះ នឹងជះឥទ្ធិពលយ៉ាងខ្លាំងដល់ក្លិបបាល់ទាត់របស់យើង ហើយយើងក៏បានជួបពិភាក្សាផ្ទៃក្នុងយ៉ាងលម្អិត និងបានវាយតម្លៃបញ្ហានេះតាមផ្នែកច្បាប់កីឡារផងដែរ»។
«ដោយសារតែផលវិបាកធ្ងន់ធ្ងរដែលអាចកើតមាន ចំពោះក្លិប យើងគ្មានជម្រើសអ្វីក្រៅពីចូលរួមការប្រកួតនោះទេ។ យើងសូមការយោគយល់ចំពោះស្ថានភាពដែលក្លិប កំពុងជួបប្រទះ ដែលវាមិនមែនជាកំហុសដោយសារក្លិបនោះទេ»។ ក្លិបព្រះខ័នរាជស្វាយរៀង បានបន្ថែមថា៖ «យើងតែងតែផ្តល់តម្លៃខ្ពស់ និងបន្តគោរពរាល់កង្វល់របស់អ្នកគាំទ្រយើងជានិច្ច។ ជាងពេលណាៗទាំងអស់ យើងត្រូវការ ការគាំទ្រពីអ្នកទាំងអស់គ្នា ខណៈពេលដែលយើងតំណាងឱ្យប្រទេសកម្ពុជានៅលើឆាកអន្តរជាតិនេះ»៕
