ក្រសួងអប់រំ យុវជន និងកីឡា ក្រោមការជួយសម្របសម្រួល និងរៀបចំដោយលេខាធិការដ្ឋានអាស៊ាន គឺបានទទួលជោគជ័យយ៉ាងត្រចះត្រចង់ ចំពោះការធ្វើម្ចាស់ផ្ទះសិក្ខាសាលាពិគ្រោះយោបល់ស្ដីពី «ការកំណត់អាទិភាព និងកៀរគរធនធានសម្រាប់ផែនការការងារអាស៊ាន ស្ដីពីកីឡា ឆ្នាំ២០២៦-២០៣០» ដោយអាស៊ាន បានគាំទ្រទៅលើគោលការណ៍ទាំង៣របស់កម្ពុជា ក្នុងការជំរុញទាំងកីឡាប្រពៃណី និងកីឡាទំនើបរបស់អាស៊ានឱ្យឈានទៅកម្រិតខ្ពស់ និងមានសន្តិភាព។
នៅក្នុងពិធីបិទវគ្គ នៅសណ្ឋាគារកាំបូឌីយ៉ាណា កាលពីព្រឹកថ្ងៃទី ១ ខែមេសានេះ តំណាងរបស់លេខាធិការដ្ឋានអាស៊ាន បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ម្ចាស់ផ្ទះកម្ពុជា ដែលរៀបចំសិក្ខាសាលារយៈពេល២ថ្ងៃនេះ បានយ៉ាងល្អ និងប្រកបដោយជោគជ័យ ដោយមានការពិភាក្សា និងផ្លាស់ប្តូរយោបល់គ្នាគ្រប់ភាគី ហើយបានឯកភាពគ្នាទទួលយកនូវគោលការណ៍ទាំង៧ចំណុចរបស់អាស៊ាន ស្ដីពីកីឡា ឆ្នាំ២០២៦-២០៣០។
គោលការណ៍ទី១ កីឡាដើម្បីអភិវឌ្ឍ និងសន្តិភាព ទី២ កំណើនប្រកបដោយចីរភាព ទី៣ វិទ្យាសាស្ត្រកីឡា ការបណ្តុះបណ្តាល ការអប់រំ និងបច្ចេកវិទ្យា ទី៤ ភាពសុចរិតនៃកីឡា ទី៥ របៀបរស់នៅដែលមានសុខភាពល្អ និងការរួមបញ្ចូលក្នុងកីឡា ទី៦ កីឡាសហគមន៍ និងតម្លៃវប្បធម៌ (កីឡាប្រពៃណីអត្តសញ្ញាណជាតិ) និងទី៧ ការអភិវឌ្ឍឧស្សាហកម្មកីឡា និងទេសចរណ៍កីឡា។
ជាមួយនេះ លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា បានសាទរចំពោះលទ្ធផល ដែលសម្រេចបាន នៅក្នុងសិក្ខាសាលារយៈពេល២ថ្ងៃនេះ ដែលជាការបើកផ្លូវសម្រាប់កម្ពុជា ឈានទៅធ្វើម្ចាស់ផ្ទះកិច្ចប្រជុំឧត្តមមន្ដ្រីកីឡាអាស៊ាន និងកិច្ចប្រជុំរដ្ឋមន្ដ្រីកីឡាអាស៊ាន នាចុងឆ្នាំ២០២៦ និងឆ្នាំ២០២៧។
អ្នកជំនាញកីឡារូបនេះ បានសង្កត់ធ្ងន់ទៅលើភាពជោគជ័យរបស់ម្ចាស់ផ្ទះកម្ពុជា ដែលត្រូវបានសមាជិកអាស៊ានទាំង១១ប្រទេស គាំទ្រក្នុងការអនុវត្តនូវគោលការណ៍សំខាន់ទាំង៣ ដែលកម្ពុជាចង់បានបំផុត គឺទី១ កម្ពុជាចង់ឱ្យអាស៊ានទាំងមូល ពង្រឹង និងជំរុញទៅលើការអនុវត្តគោលការណ៍កីឡាដើម្បីសន្តិភាព កីឡាដើម្បីកាទូត និងកីឡាដើម្បីការអភិវឌ្ឍទាំងអស់គ្នា ទី២ ជំរុញឱ្យមានការជ្រោមជ្រែងទៅលើការបណ្តុះបណ្តាលបច្ចេកវិទ្យា ជំនាញ វិជ្ជាជីវៈកីឡាកម្រិតខ្ពស់ និងវិទ្យាសាស្ត្រកីឡា ហើយទី៣ ជំរុញឱ្យមានការអភិវឌ្ឍកីឡាវប្បធម៌ប្រពៃណីរបស់អាស៊ានទាំងមូល។
លោក វ៉ាត់ ចំរើន បានថ្លែងថា៖ «ការធ្វើសិក្ខាសាលានេះ យើងទទួលបានធាតុចូលជាច្រើន និងទទួលបានការជំរុញពីអាស៊ានទៅតាមគោលបំណងសំខាន់ទាំង៣ ដែលកម្ពុជាចង់បាន។ បន្ថែមលើនេះ យើងចង់ពង្រីកដៃគូផ្នែកកីឡារបស់អាស៊ាន ដោយកន្លងមកយើងមានចិន និងជប៉ុន តែឥឡូវនេះ កូរ៉េ ជាសក្តានុពលធំមួយ ដែលយើងមិនអាចចោលបាន ព្រោះកូរ៉េ បានជួយទៅដល់អាស៊ាន និងជួយទៅលើវិស័យកីឡាច្រើន ជាពិសេសនៅកម្ពុជា អ៊ីចឹងយើងទាញឱ្យបានដៃគូមួយទៀតជាមួយកូរ៉េ ដោយផ្តើមចេញពីកម្ពុជាធ្វើជាម្ចាស់ផ្ទះ»។
លោក វ៉ាត់ ចំរើន បន្ថែមថា៖ «កូរ៉េ ខ្លាំងទៅលើកាទូតកីឡា ជាពិសេសខាងផ្នែកកីឡាប្រពៃណីនេះ គឺគេបានធ្វើ World Martial Arts របស់អង្កការយូណេស្កូ ជារៀងរាល់ឆ្នាំ។ កូរ៉េមានបទពិសោធន៍ល្អខាងហ្នឹង ហើយយើងចង់ជំរុញកីឡាប្រពៃណីរបស់យើងទៅពិភពលោក អ៊ីចឹងយើងពង្រីកកិច្ចសហប្រតិបត្តិការជាមួយកូរ៉េ គឺជាផ្លូវមួយ ដែលយើងបើកឱ្យពិភពលោកទទួលយកកីឡាប្រពៃណីរបស់យើង ជាពិសេសគុនខ្មែរ ដែលយើងត្រៀមពង្រីកវាឱ្យទៅជាកីឡាអូឡាំពិក នាពេលអនាគត»។
លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិអូឡាំពិកកម្ពុជាផងនោះ បានឱ្យដឹងទៀតថា ការរុញកីឡាប្រពៃណី «គុនខ្មែរ» ឱ្យក្លាយជាកីឡាអូឡាំពិកនេះ គឺជាគោលការណ៍របស់ក្រសួងអប់រំ យុវជន និងកីឡា ដោយមានការគាំទ្រពីចលនាអូឡាំពិក និងភាគីពាក់ព័ន្ធមួយចំនួនទៀត ហើយការជួយគាំទ្រពីអាស៊ាន តាមរយៈសិក្ខាសាលានេះ ក៏ជាផ្នែកសំខាន់មួយ ក្នុងការឈានទៅសម្រេចគោលបំណងដ៏ធំនេះផងដែរ។
លោក វ៉ាត់ ចំរើន បានបញ្ជាក់ថា៖ «សិក្ខាសាលានេះ វាហុចផលឱ្យយើង ជំរុញលើរឿងទាំងអស់ហ្នឹង ដែលជាប្រយោជន៍របស់កីឡាយើង និងកេរ្តិ៍ឈ្មោះប្រទេសជាតិរបស់យើងនៅលើឆាកនយោបាយអាស៊ាន និងនៅលើពិភពលោក ហើយប្រតិភូទាំងអស់ ដែលបានចូលរួមក្នុងសិក្ខាសាលានេះ មានភាពកក់ក្តៅ និងស្ងើចសរសើរចំពោះការទទួលស្វាគមន៍ និងការបដិសណ្ឋារកិច្ចបានយ៉ាងល្អរបស់កម្ពុជា»៕
ប្រភព៖ PostKhmer