ប្រធានាធិបតី ត្រាំ បានគំរាមបើកការវាយប្រហារទ្រង់ទ្រាយធំ សំដៅលើស្ពាន រោងចក្រអគ្គិសនី និងទីតាំងស៊ីវិលផ្សេងៗទៀត ត្រឹមល្ងាចថ្ងៃអង្គារ ម៉ោងនៅសហរដ្ឋអាមេរិក។ លោកថ្លែងនៅថ្ងៃចន្ទថា សហរដ្ឋអាមេរិកនឹងពិចារណាជួយកសាងអ៊ីរ៉ង់ឡើងវិញ ប្រសិនបើពួកគេអាចឈានដល់កិច្ចព្រមព្រៀងមួយ។
លោក ត្រាំ បានថ្លែងនៅចន្ទ ថា សំណើបទឈប់បាញ់ដែលដាក់ចេញដោយអ្នកសម្របសម្រួលរវាងសហរដ្ឋអាមេរិក និងអ៊ីរ៉ង់ គឺជា «ជំហានដ៏សំខាន់មួយ» ប៉ុន្តែលោកបានព្រមានថា វានៅតែ «មិនទាន់ល្អគ្រប់គ្រាន់» នោះទេ ខណៈដែលឱសានវាទសម្រាប់កិច្ចព្រមព្រៀងនៅល្ងាចថ្ងៃអង្គាររបស់លោកកំពុងខិតជិតមកដល់។
ចំណែកឯភាគីអ៊ីរ៉ង់វិញ បានបដិសេធរាល់សំណើបទឈប់បាញ់ណាមួយ ដោយទាមទារថា ផែនការសន្តិភាពណាមួយត្រូវតែរួមបញ្ចូលនូវការបញ្ចប់ការប្រយុទ្ធទាំងស្រុង។ មន្ត្រីអ៊ីរ៉ង់បាននិយាយថា ការចរចាតាមផ្លូវការទូតដែលសម្របសម្រួលដោយប្រទេសប៉ាគីស្ថាន និងបណ្តាប្រទេសក្នុងតំបន់ផ្សេងទៀតកំពុងបន្តធ្វើឡើង ទោះបីជាហាក់ដូចជាមានការព្រមព្រៀងគ្នាតិចតួចលើទម្រង់នៃការបញ្ឈប់អរិភាពយ៉ាងណាក៏ដោយ។
ប្រសិនបើអ៊ីរ៉ង់មិនយល់ព្រមបើកច្រកសមុទ្រហ័រមុស (Hormuz) ឡើងវិញត្រឹមល្ងាចថ្ងៃអង្គារទេនោះ លោក ត្រាំ បានគំរាមបើកការវាយប្រហារទ្រង់ទ្រាយធំសំដៅលើស្ពាន រោងចក្រអគ្គិសនី និងទីតាំងស៊ីវិលផ្សេងៗទៀត ដែលតាមសម្តីរបស់លោក វានឹងធ្វើឱ្យអ៊ីរ៉ង់ «ត្រឡប់ទៅរកយុគសម័យថ្មវិញ»។
ប៉ុន្តែប្រធានាធិបតីអាមេរិកក៏ធ្លាប់បានពន្យារពេលឱសានវាទដែលលោកកំណត់ដោយខ្លួនឯងជាច្រើនលើកផងដែរក្នុងរយៈពេលប៉ុន្មានសប្តាហ៍ថ្មីៗនេះ ហើយក្រុមអ្នកការទូតជុំវិញពិភពលោកកំពុងចោទសួរថា តើលោក ត្រាំ នឹងស្វែងរកផ្លូវចេញម្តងទៀត ឬមួយក៏លោកនឹងអនុវត្តតាមការគំរាមកំហែងនៅពេលនេះ ដែលអាចបង្កឱ្យមានមហាជម្លោះឆាបឆេះយ៉ាងសន្ធោសន្ធៅកាន់តែខ្លាំង៕
ប្រភព៖ PostKhmer