ភ្នំពេញ៖ ចម្រៀងមួយបទដែលត្រូវបាននិពន្ធដោយសិស្សកម្ពុជាម្នាក់ ដើម្បីលើកទឹកចិត្តមិត្តភក្តិជិតស្និទ្ធរបស់នាងដែលកំពុងខ្វះទំនុកចិត្តលើខ្លួនឯង បានក្លាយជាសារដ៏មានន័យសម្រាប់ការលើកកម្ពស់ស្ត្រី និងក្មេងស្រី នៅក្នុងឱកាសអបអរសាទរទិវានារីអន្ដរជាតិឆ្នាំនេះ។
បទចម្រៀងដែលមានចំណងជើងថា «Believe» (ជឿជាក់) ត្រូវបាននិពន្ធឡើងដោយកញ្ញា យ៉ែម សុវណ្ណារី នៅពេលជាសិស្សក្នុងកម្មវិធីរបស់អង្គការកុមារកម្ពុជា (CCF) ដើម្បីលើកទឹកចិត្តមិត្តភក្តិជិតស្និទ្ធ គឺកញ្ញា ធី ខាវ ដែលកំពុងប្រឈមនឹងភាពមិនប្រាកដប្រជា និងការសង្ស័យលើសមត្ថភាពខ្លួនឯងអំពីអនាគត។
អង្គការ CCF បានចេញផ្សាយវីដេអូចម្រៀងផ្លូវការសម្រាប់បទនេះនៅថ្ងៃទី៨ ខែមីនា ដោយលើកឡើងថា សាររបស់បទចម្រៀងនេះ គឺជាការលើកទឹកចិត្តឱ្យស្ត្រី និងក្មេងស្រីទាំងអស់ មានជំនឿលើខ្លួនឯង ទោះបីជាពួកគេកំពុងប្រឈមមុខនឹងឧបសគ្គ ឬការសង្ស័យលើសមត្ថភាពខ្លួនឯងក៏ដោយ។
កញ្ញា សុវណ្ណារី បាននិយាយថា កញ្ញាបានសរសេរបទចម្រៀងនេះ ព្រោះចង់ឱ្យមិត្តភក្ដិមានទំនុកចិត្តលើខ្លួនឯង។
កញ្ញាបាននិយាយថា៖ «ខ្ញុំបានសរសេរបទចម្រៀងនេះ ព្រោះខ្ញុំចង់ឱ្យ ខាវ មានទំនុកចិត្ត ព្រោះខ្ញុំដឹងថាគាត់មានសមត្ថភាព ហើយអាចធ្វើអ្វីៗបាន ប្រសិនបើគាត់ជឿជាក់លើខ្លួនឯង»។
បទចម្រៀងនេះត្រូវបានផលិត និងរៀបចំតន្ត្រីដោយលោក ឆោម ផានិត ដែលនៅពេលនោះធ្វើការនៅក្នុងកម្មវិធីភាពជាអ្នកដឹកនាំរបស់ CCF ហើយបច្ចុប្បន្នជាអ្នកនិពន្ធបទចម្រៀង និងអ្នកបង្កើតមាតិកា ខណៈពេលដែលសុវណ្ណារី ជាអ្នកនិពន្ធទំនុកច្រៀង និងជាអ្នកច្រៀងផងដែរ។
ទោះជាយ៉ាងណា បន្ទាប់ពីពួកគេធំឡើង ជីវិតរបស់យុវនារីទាំងពីរបានដើរតាមផ្លូវខុសគ្នា។ កញ្ញា សុវណ្ណារី ទទួលបានអាហារូបករណ៍ទៅសិក្សានៅប្រទេសអូស្ត្រាលី ខណៈពេលដែល កញ្ញា ខាវ បន្តការសិក្សានៅសាកលវិទ្យាល័យមួយនៅកម្ពុជា។
ប៉ុន្តែសារ និងអត្ថន័យនៃបទចម្រៀងនេះ នៅតែមានសារៈសំខាន់សម្រាប់ពួកគេទាំងពីរ។
ក្នុងឆ្នាំ២០២៥ បទចម្រៀង “Believe” ត្រូវបានថតឡើងវិញ និងកែសម្រួលជាស្ទូឌីយោពេញលេញ ដោយមានលោក ផានិត ជួយសម្របសម្រួលផលិតកម្មឡើងវិញ។ ក្រុមផលិតកម្មរបស់ CCF ក៏បានផលិតវីដេអូចម្រៀងសម្រាប់បទនេះផងដែរ។
ក្នុងអំឡុងពេលនៃការថតឡើងវិញ បទចម្រៀងថ្មីនេះត្រូវបានចាក់ឱ្យកញ្ញា ខាវ ស្តាប់ជាលើកដំបូង នៅពេលកញ្ញាបានជួប សុវណ្ណារី ម្តងទៀត បន្ទាប់ពីពួកគេមិនបានជួបគ្នាអស់រយៈពេលជាច្រើនឆ្នាំ។
កញ្ញា ខាវ អាយុ២៥ឆ្នាំ បាននិយាយទាំងរំជួលចិត្តថា៖ «ខ្ញុំពិតជារំភើបណាស់ដែលបានឮបទចម្រៀងនេះម្តងទៀត។ វាធ្វើឱ្យខ្ញុំនឹកឃើញអតីតកាល មិត្តភាពរបស់យើង និងការលើកទឹកចិត្តដែលធ្លាប់ជួយឱ្យខ្ញុំជឿជាក់លើខ្លួនឯង»។
កញ្ញា ខាវ បានបញ្ចប់ការសិក្សាផ្នែកចិត្តវិទ្យាពីសាកលវិទ្យាល័យភូមិន្ទភ្នំពេញ ក្នុងឆ្នាំ២០២២ ហើយបច្ចុប្បន្នកំពុងធ្វើការជាបុគ្គលិកជាន់ខ្ពស់ផ្នែកគាំទ្រការលក់នៅក្រុមហ៊ុនធានារ៉ាប់រងមួយ។
សម្រាប់កញ្ញា សុវណ្ណារី ដែលធំធាត់នៅខេត្ដកំពង់ចាម កញ្ញាមិនបានចូលសាលារៀនភ្លាមៗទេ ដោយសារតែក្រុមគ្រួសារអាចផ្តល់ឱកាសសិក្សាបានតែកូនម្នាក់ប៉ុណ្ណោះ។ រហូតដល់អាយុ៧ឆ្នាំ បន្ទាប់ពីបានចូលកម្មវិធីរបស់ CCF ទើបកញ្ញាមានឱកាសទទួលបានការអប់រំ។
ក្រោយមក យុវតីរូបនេះបានបន្តការសិក្សានៅបរទេស និងបានបញ្ចប់បរិញ្ញាបត្រពី University of Melbourne ជាមួយមុខវិជ្ជាពីរផ្នែក គឺសិក្សាអន្តរជាតិ និងនយោបាយ ព្រមទាំងប្រព័ន្ធផ្សព្វផ្សាយ និងទំនាក់ទំនង។
កញ្ញាបានត្រឡប់មកកម្ពុជាវិញនៅឆ្នាំ២០២៤ ហើយបច្ចុប្បន្នកំពុងធ្វើការជាអ្នកប្រឹក្សាផ្នែករាយការណ៍ និងវិភាគសេវាសង្គម ខណៈពេលបន្តការសិក្សាថ្នាក់អនុបណ្ឌិតផ្នែកច្បាប់អន្តរជាតិ នៅ American University of Phnom Penh។
ស្ថាបនិក និងនាយកប្រតិបត្តិ CCF លោក Scott Neeson បានថ្លែងថា បទចម្រៀងនេះឆ្លុះបញ្ចាំងពីបេសកកម្មស្នូលរបស់អង្គការ ក្នុងការលើកកម្ពស់ភាពជាអ្នកដឹកនាំ ការយល់ចិត្ត និងការគាំទ្រគ្នាទៅវិញទៅមកក្នុងសហគមន៍សិស្ស។
លោកបាននិយាយថា៖ «នៅ CCF យើងមានកម្មវិធីភាពជាអ្នកដឹកនាំដ៏រឹងមាំ ហើយចំណុចស្នូលនៃការគាំទ្រនោះគឺការជួយគ្នាទៅវិញទៅមក និងការរៀនពីគុណតម្លៃនៃការយល់ចិត្តអ្នកដទៃ។ បទចម្រៀងរបស់ សុវណ្ណារី បង្ហាញពីអ្វីទាំងនេះបានយ៉ាងច្បាស់»។
ទោះបីជាបទចម្រៀងនេះត្រូវបានសរសេរឡើងសម្រាប់មិត្តម្នាក់ក៏ដោយ សាររបស់វាមានគោលដៅឆ្ពោះទៅកាន់ស្ត្រី និងក្មេងស្រីគ្រប់ទីកន្លែង ជាពិសេសអ្នកដែលកំពុងប្រឈមមុខនឹងឧបសគ្គ ឬការសង្ស័យលើសមត្ថភាពខ្លួនឯង។
កញ្ញា ខាវ បានបង្ហាញក្តីសង្ឃឹមថា បទចម្រៀងនេះនឹងជួយលើកទឹកចិត្តអ្នកដទៃឱ្យជឿជាក់លើខ្លួនឯង។
កញ្ញា សុវណ្ណារី ក៏បានលើកឡើងដូចគ្នាថា នាងសង្ឃឹមថាអ្នកដែលស្តាប់បទចម្រៀងនេះ នឹងទទួលបានកម្លាំងចិត្ត ហើយចែករំលែកសារនេះទៅកាន់អ្នកផ្សេងទៀតដែលត្រូវការការលើកទឹកចិត្ត។
យុវតីបានបន្ថែមថា៖ «ដរាបណាអ្នកជឿជាក់លើខ្លួនឯង អ្នកអាចធ្វើវាបាន។ កុំបោះបង់ ហើយចូរចាប់យកឱកាសរបស់អ្នក»។
វីដេអូចម្រៀងផ្លូវការសម្រាប់បទ “Believe” បច្ចុប្បន្នអាចទស្សនាបានតាមអ៊ីនធឺណិត៕
ប្រភព៖ PostKhmer
