ក្នុងរយៈពេលពីរទសវត្សរ៍ចុងក្រោយនេះ មានការផ្លាស់ប្តូរយ៉ាងខ្លាំងចំពោះសេរីភាពក្នុងការធ្វើដំណើរលើសកលលោក ដែលស្តែងឱ្យឃើញយ៉ាងច្បាស់តាមរយៈការធ្លាក់ចុះនៃឥទ្ធិពលលិខិតឆ្លងដែនសហរដ្ឋអាមេរិក នៅក្នុងសន្ទស្សន៍លិខិតឆ្លងដែន Henley (Henley Passport Index)។ ខណៈដែលលិខិតឆ្លងដែនអាមេរិកធ្លាប់មានឥទ្ធិពលខ្លាំងបំផុតនៅលើពិភពលោកកាលពីឆ្នាំ ២០០៦ ប៉ុន្តែបច្ចុប្បន្នបានធ្លាក់មកឈរនៅចំណាត់ថ្នាក់ទី ១០ ហើយមាន ៣៦ ប្រទេសកំពុងនាំមុខអាមេរិក ទោះបីមានប្រទេសកើនឡើងពី ១៣០ ទៅ ១៨០ ប្រទេសដែលពលរដ្ឋអាមេរិកអាចធ្វើដំណើរទៅបានដោយមិនបាច់ទិដ្ឋាការ (Visa) ។ បច្ចុប្បន្ន ប្រទេសសិង្ហបុរីក្តោបក្តាប់តំណែងកំពូលគេ ដោយអាចធ្វើដំណើរទៅកាន់ ១៩២ គោលដៅ ដោយមានប្រទេសជប៉ុន កូរ៉េខាងត្បូង និងអារ៉ាប់រួមនៅដេញតាមពីក្រោយយ៉ាងប្រកៀក ហើយអារ៉ាប់រួមត្រូវបានចាត់ទុកជារឿងរ៉ាវជោគជ័យដ៏ធំបំផុតក្នុងសន្ទស្សន៍នេះ បន្ទាប់ពីបានបន្ថែមគោលដៅធ្វើដំណើរឥតទិដ្ឋាការរហូតដល់ ១៥៣ ប្រទេសក្នុងរយៈពេល ២០ ឆ្នាំ។
ការផ្លាស់ប្តូរនេះបានបង្ហាញពីគម្លាតកាន់តែទូលំទូលាយនៃសេរីភាពធ្វើដំណើរសកល ដោយគម្លាតរវាងពលរដ្ឋដែលមានសេរីភាពធ្វើដំណើរច្រើនជាងគេ (សិង្ហបុរី) និងតិចជាងគេ (អាហ្វហ្គានីស្ថាន) បានកើនឡើងដល់ ១១៨ គោលដៅ ខណៈដែលប្រទេសបូលីវី គឺជាប្រទេសតែមួយគត់ដែលបានបាត់បង់ចំនួនគោលដៅធ្វើដំណើរដោយឥតទិដ្ឋាការ។ ទោះបីជាឥទ្ធិពលនៃលិខិតឆ្លងដែនជាទូទៅមានទំនាក់ទំនងស្របគ្នាជាមួយនឹងសន្តិភាពជាតិ — ដូចដែលបានឃើញក្នុងចំណោមប្រទេសកំពូលៗដូចជា សិង្ហបុរី ដាណឺម៉ាក និងស្វ៊ីស — សហរដ្ឋអាមេរិកនៅតែជាករណីលើកលែងដ៏លេចធ្លោមួយ។ ដោយឈរនៅចំណាត់ថ្នាក់ទី ១០ ខាងផ្នែកឥទ្ធិពលលិខិតឆ្លងដែន ប៉ុន្តែស្ថិតនៅចំណាត់ថ្នាក់ទី ១៣៤ ឯណោះនៅក្នុងសន្ទស្សន៍សន្តិភាពសកល (Global Peace Index) សហរដ្ឋអាមេរិកត្រូវពឹងផ្អែកយ៉ាងខ្លាំងលើដើមទុនទូត ឥទ្ធិពលសេដ្ឋកិច្ច និងទំនុកចិត្តលើគ្រឹះស្ថានរបស់ខ្លួនដែលបានសន្សំជាច្រើនទសវត្សរ៍ ដើម្បីរក្សាតំណែងធ្វើដំណើរ ខណៈប្រទេសដទៃទៀតកំពុងរត់លឿនជាងខ្លួន ៕