កម្ពុជា ក្នុងនាមជាម្ចាស់ផ្ទះរៀបចំសិក្ខាសាលាពិគ្រោះយោបល់ស្ដីពី «ការកំណត់អាទិភាព និងកៀរគរធនធានសម្រាប់ផែនការការងារអាស៊ាន ស្ដីពីកីឡា ឆ្នាំ២០២៦-២០៣០» បានជំរុញឱ្យប្រទេសទាំងអស់ នៅក្នុងតំបន់អាស៊ាន នាំគ្នាលើកកម្ពស់កីឡាអត្តសញ្ញាណជាតិរបស់ប្រទេសមួយៗ ជាពិសេសត្រូវប្រើប្រាស់ស្មារតី និងយន្តការកីឡា ដើម្បីលុបបំបាត់នូវជម្លោះ និងវិវាទផ្សេងៗ បង្កើតឱ្យមានសន្តិភាព និងការអភិវឌ្ឍវិស័យកីឡានៅអាស៊ាន។
នៅក្នុងពិធីបើកសិក្ខាសាលា នៅសណ្ឋាគារកាំបូឌីយ៉ាណា កាលពីព្រឹកថ្ងៃទី ៣១ ខែមីនានេះ ប្រទេសជាសមាជិកអាស៊ានចំនួន៨ សុទ្ធតែបានចាត់តំណាងឱ្យមកចូលរួមដោយផ្ទាល់ លើកលែងតែប្រទេសថៃ ហ្វីលីពីន និងទីម័រខាងកើត ដែលបានចូលរួមក្នុងកម្មវិធីនេះ តាមរយៈ Zoom។
លោក វ៉ាត់ ចំរើន រដ្ឋលេខាធិការ តំណាងលោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ យុវជន និងកីឡា បានស្វាគមន៍ចំពោះវត្តមានប្រតិភូបណ្ដាប្រទេសសមាជិកទាំងអស់ ដែលបានចូលរួមសិក្ខាសាលាពិគ្រោះយោបល់ដ៏មានសារៈសំខាន់នេះ សម្រាប់ដំណើរឆ្ពោះទៅកាន់កិច្ចប្រជុំឧត្តមមន្ដ្រីកីឡាអាស៊ាន និងកិច្ចប្រជុំរដ្ឋមន្ដ្រីកីឡាអាស៊ាន នាចុងឆ្នាំ២០២៦ និងឆ្នាំ២០២៧ ដែលកម្ពុជានឹងធ្វើម្ចាស់ផ្ទះ។
សិក្ខាសាលាកម្រិតតំបន់លើវិស័យកីឡានេះ ផ្ដោតលើការងារសំខាន់ៗជាច្រើន ដោយផ្អែកលើគោលការណ៍ទាំង៧ចំណុចរបស់អាស៊ាន ទី១ កីឡាដើម្បីអភិវឌ្ឍ និងសន្តិភាព ទី២ កំណើនប្រកបដោយចីរភាព ទី៣ វិទ្យាសាស្ត្រកីឡា ការបណ្តុះបណ្តាល ការអប់រំ និងបច្ចេកវិទ្យា ទី៤ ភាពសុចរិតនៃកីឡា ទី៥ របៀបរស់នៅដែលមានសុខភាពល្អ និងការរួមបញ្ចូលក្នុងកីឡា ទី៦ កីឡាសហគមន៍ និងតម្លៃវប្បធម៌ និងទី៧ ការអភិវឌ្ឍឧស្សាហកម្មកីឡា និងទេសចរណ៍កីឡា។
យ៉ាងណាក៏ដោយ នៅក្នុងចំណោលគោលទាំង៧នេះ កម្ពុជា ក្នុងនាមជាម្ចាស់ផ្ទះ បានសង្កត់ធ្ងន់ទៅលើ «កីឡាដើម្បីអភិវឌ្ឍ និងសន្តិភាព» ព្រោះវាជាប្រធានបទក្តៅ ដែលទាក់ទងនឹងជម្លោះនៅព្រំដែនកម្ពុជា-ថៃ ធ្វើឱ្យវិស័យកីឡានៅអាស៊ាន មានការធ្លាក់ចុះ បន្ទាប់ពីភាគីថៃ បានរំលោភនូវគោលការណ៍កីឡា តាមរយៈការយកនយោបាយផ្ទៃក្នុង មកដាក់សម្ពាធកម្ពុជា រហូតប្រតិភូកីឡាកម្ពុជា បង្ខំចិត្តដកខ្លួនចេញពីការប្រកួតស៊ីហ្គេម លើកទី៣៣ ឆ្នាំ២០២៥ ដែលថៃធ្វើជាម្ចាស់ផ្ទះត្រឹមពាក់កណ្តាលទី។
[img]
លោក វ៉ាត់ ចំរើន បានប្រាប់ប្រព័ន្ធផ្សព្វផ្សាយ ក្រោយពិធីបើកសិក្ខាសាលាថា៖ «កីឡាដើម្បីការអភិវឌ្ឍ និងសន្ដិភាពនេះ គឺជាប្រធានបទ ដែលកម្ពុជាជំរុញហើយជំរុញទៀត ឱ្យអាស៊ានយកចិត្តទុកដាក់ ហើយឱ្យអាស៊ាន ដាក់អាទិភាពទៅលើប្រធានបទកីឡា ដែលនាំមកនៅសេចក្តីសុខ សន្តិភាព និងសុខដុមនីយកម្មនៅក្នុងតំបន់របស់យើង ដោយចៀសវាងនូវវិបត្តិទាំងឡាយ និងវិវាទផ្សេងៗទៀតនៅក្នុងអាស៊ាន»។
លោក វ៉ាត់ ចំរើន បានបន្ថែមថា៖ «កាលណាយើងសង្កត់ធ្ងន់ទៅលើការទូតកីឡា និងសន្តិសុខ សណ្តាប់ធ្នាប់របស់អាស៊ាន តាមរយៈកីឡាហ្នឹងហើយ គឺរាល់ជម្លោះ និងបញ្ហាទាំងអស់ ត្រូវយកមកជជែកគ្នាក្នុងរង្វង់គ្រួសារនៃយន្តការកីឡារបស់អាស៊ាន អ៊ីចឹងយើងបានដាក់រឿងនេះជាអាទិភាពតែម្តង»។
«យើងមិននិយាយត្រង់ទៅលើជម្លោះ (កម្ពុជា-ថៃ) ហ្នឹងទេ តែយើងនិយាយអំពីអ្វីដែលយើងអាចអង្គុយជជែកគ្នាបាន និងរួមគ្នាអភិវឌ្ឍបាន នៅក្នុងស្មារតីជាកីឡា គឺគ្មាននយោបាយ គ្មានការប៉ះពាល់រឿងអ្វីផ្សេងនោះទេ ក្រៅតែពីស្វែងរកការរស់នៅដោយសុខដុមរមនា និងកសាងនូវសង្គមអាស៊ានមួយ ដែលមានសេចក្តីសុខ និងសន្តិភាព»។ លោក វ៉ាត់ ចំរើន បានបញ្ជាក់។
ជាមួយគ្នានេះ កម្ពុជាក៏បានផ្តោតទៅលើការអភិវឌ្ឍកីឡាសហគមន៍ និងតម្លៃវប្បធម៌ ដោយកម្ពុជាជំរុញឱ្យមានការរៀបចំការអនុវត្តផ្ទាល់នូវប្រភេទកីឡាអត្តសញ្ញាណជាតិ និងជាហ្គេមនៃប្រភេទកីឡាប្រពៃណីរបស់ប្រទេសមួយៗ នៅក្នុងអាស៊ាន ព្រោះប្រទេសទាំង១១ នៅក្នុងអាស៊ាននេះ មានក្បាច់គុនជាកីឡាប្រពៃណីចម្រុះច្រើន ហើយមានប្រភពល្អៗច្រើន ដែលអាចផ្សព្វផ្សាយលើសពីតំបន់អាស៊ានបាន។
លោក វ៉ាត់ ចំរើន បានថ្លែងថា៖ «អាស៊ាន មានគោលការណ៍រួចហើយ ក្នុងការធ្វើការងារជាមួយប្រទេសចិន និងបណ្តាប្រទេសផ្សេងទៀត ប៉ុន្តែរឿងកីឡាប្រពៃណីអត្តសញ្ញាណជាតិនេះ យើងឃើញថា មិនទាន់បានយកមកបង្ហាញ និងអនុវត្តនៅឡើយ អ៊ីចឹងក្នុងពេលនេះកម្ពុជាធ្វើជាម្ចាស់ផ្ទះនេះ យើងជំរុញលើរឿងហ្នឹង»។
លោកបញ្ជាក់ថា៖ «យើងនឹងធ្វើការប្រកួត ឬសម្តែង ដោយមានការដាក់ពិន្ទុប្រជែងមួយ ដើម្បីបង្ហាញនូវស្នាដៃ និងទេពកោសល្យនៃកីឡាប្រពៃណីអត្តសញ្ញាណជាតិ ជាពិសេសកីឡាយុទ្ធគុនរបស់ប្រទេសមួយៗ ដើម្បីយើងលើកតម្កើងវប្បធម៌ និងសិល្បៈក្បាច់គុននៃប្រទេសនីមួយៗ ហើយវាក៏ជាបំណងប្រាថ្នារបស់ UNESCO ដែលចង់បានការថែរក្សាមរតកក្បាច់គុនដូនតា និងមរតកវប្បធម៌របស់ជាតិសាសន៍មួយៗ ដោយ UNESCO នឹងជួយលើការងារនេះផងដែរ»៕
ប្រភព៖ PostKhmer
