ប្រធានសហព័ន្ធកីឡាប្រដាល់គុនខ្មែរ លោក ខូវ ឆាយ បានបញ្ជាក់ថា ស្នងការប្រកួត និងគណៈវិនិច្ឆ័យដ៏ល្អ ត្រូវតែមានចំណេះដឹង មានក្រមសីលធម៌វិជ្ជាជីវៈ និងប្រកាន់ខ្ជាប់នូវអព្យាក្រឹត្យ យុត្តិធម៌ មិនលំអៀង ទៅលើការកាត់សេចក្តី ទើបមិនប៉ះពាល់ដល់ការសម្រេចលទ្ធផល និងធ្វើឱ្យគុនខ្មែរ មានការរីកចម្រើនដ៏ពិតប្រាកដ។
លោក ខូវ ឆាយ បាននិយាយបែបនេះ នៅពេលលោកចូលរួមក្នុងពិធីបិទ «វគ្គបំប៉នសមត្ថភាពស្នងការប្រកួត និងគណៈវិនិច្ឆ័យកីឡាប្រដាល់គុនខ្មែរ» នៅពហុកីឡដ្ឋានជាតិ កាលពីថ្ងៃព្រហស្បតិ៍ ដោយវគ្គនេះ មានរយៈពេល៤ថ្ងៃ ចាប់ពីថ្ងៃទី៦ ដល់ថ្ងៃទី៩ ខែមេសា ឆ្នាំ២០២៦។
លោក ឆាយ បានកោតសរសើរ និងវាយតម្លៃខ្ពស់ទៅដល់គណៈគ្របគ្រងវគ្គ លោកគ្រូឧទ្ទេស សិក្ខាកាម និងផ្នែកពាក់ព័ន្ធទាំងអស់ ដែលបានយកអស់កម្លាំងកាយ ចិត្ត ខិតខំប្រឹងប្រែងរៀបចំឱ្យវគ្គនេះដំណើការដោយរលូន និងទទួលបានជោគជ័យ ដោយថ្នាក់ដឹកនាំសហព័ន្ធទាំងអស់ ជាពិសេសនាយកដ្ឋានកីឡាជំនាញ និងកីឡាមហាជន បានចាត់តំណាងចូលរួមទាំងពិធី បើក និង ពិធីបិទ ដើម្បីជាការលើកទឹកចិត្តដល់វគ្គនេះ។
ប្រធានសហព័ន្ធរូបនេះ បាននិយាយថា៖ «ក្នុងរយៈពេល៤ថ្ងៃនេះ បានបង្ហាញឱ្យឃើញថា ឯកឧត្តម លោកគ្រូឧទ្ទេស សិក្ខាកាម បានប្តេជ្ញាចិត្តយ៉ាងមុតមាំ ដោយបានលះបង់ពេលវេលា និងថាមពល ចែករំលែក និងទទួលយកចំណេះដឹង និងបទពិសោធន៍ ដើម្បីបង្កើនសមត្ថភាព បន្ថែមទៀតក្នុងនាមជាស្នងការប្រកួត និងគណៈវិនិច្ឆ័យដែលជាសរសរទ្រូង ជាឆ្អឹងខ្នង ដើរតួនាទីយ៉ាងសំខាន់ ក្នុងការដឹកនាំគ្រប់គ្រងការប្រកួត ជាអ្នកការពារច្បាប់ ការពារយុត្តិធម៌ សុវត្ថិភាព និងស្មារតីនៃកីឡារបស់គុនខ្មែរយើង»។
លោក ខូវ ឆាយ បានបញ្ជាក់ថា៖ «ស្នងការប្រកួត និងគណៈវិនិច្ឆ័យដ៏ល្អ ត្រូវតែមានចំណេះដឹង មានក្រមសីលធម៌វិជ្ជាជីវៈ និងប្រកាន់ខ្ជាប់នូវអព្យាក្រឹត្យ យុត្តិធម៌ មិនលំអៀង ព្រោះការសម្រេចចិត្តលើលទ្ធផលការប្រកួត មានផលប៉ះពាល់ដោយផ្ទាល់ទៅលើគុណផលបច្ចេកទេសរបស់អត្តពលិក ទស្សនិកជន និងកេរ្តិ៍ឈ្មោះរបស់គុនខ្មែរយើង»។
ជាមួយគ្នានេះ លោក ឆាយ បានឱ្យដឹងថា វគ្គបំប៉នសមត្ថភាពស្នងការប្រកួត និងគណៈវិនិច្ឆ័យកីឡាប្រដាល់គុនខ្មែរនេះ មិនមែនជាវគ្គចុងបញ្ចប់នៃដំណើរអភិវឌ្ឍសមត្ថភាពសិក្ខាមប្រដាល់គុនខ្មែរនោះទេ គឺគ្រាន់តែជាការចាប់ផ្តើម ដើម្បីបណ្តុះនូវចំណេះជំនាញទៅដល់សិក្ខាកាមជាថ្នាក់ដឹកនាំ គ្រូបង្វឹក និងកីឡាករ កីឡាការិនី ដើម្បីមានសមត្ថភាពយល់ដឹង កាន់តែខ្ពស់ឡើងមួយកម្រិតទៀត។
ជាមួយហេតុផលនេះ លោក ខូវ ឆាយ បានសង្កត់ធ្ងន់ថា៖ «ខ្ញុំសូមលើកទឹកចិត្តលោកគ្រូ បង ប្អូនសិក្ខាកាមទាំងអស់គ្នា ឱ្យបន្តរៀនសូត្រ អនុវត្តជាប្រចាំ និងរក្សាឱ្យបាននូវស្តង់ដាវិជ្ជាជីវៈ ក្រមសីលធម៌ខ្ពស់បំផុត ដោយតួនាទីមួយនេះ មានទាំងការទទួលខុសត្រូវ និងកិត្តិយស ហើយខ្ញុំក៏សូមអបអរសាទរដល់សិក្ខាកាមទាំងអស់ ដែលបានបញ្ចប់វគ្គនេះដោយជោគជ័យ និងបានត្រៀមខ្លួនរួចរាល់ ដើម្បីយើងធ្វើការរួមគ្នាបម្រើ ថែរក្សា លើកកម្ពស់ និងចូលរួមចំណែកដល់ការអភិវឌ្ឍកីឡាប្រដាល់គុនខ្មែររបស់យើង ឱ្យបន្តភ្លឺស្វាង ដោយមោទនភាពនៅក្នុងប្រទេស និងនៅក្រៅប្រទេស»។
តាមរបាយការណ៍របស់គណៈកម្មការរៀបចំ បានឱ្យដឹងថា វគ្គបំប៉នសមត្ថភាពស្នងការប្រកួត និងគណៈវិនិច្ឆ័យកីឡាប្រដាល់គុនខ្មែរនេះ មានសិក្ខាចូលរួមចំនួន៣២នាក់ ហើយក្រោមការបង្ហាត់បង្ហាញរបស់គ្រូឧទ្ទេសចំនួន៤នាក់ រយៈពេល៤ថ្ងៃនេះ គឺមានសិក្ខាកាម១៥ភាគរយ ទទួលបាននិទ្ទេសល្អណាស់ រីឯ ២០ភាគរយ ទទួលបាននិទ្ទេសល្អ និងសិក្ខាកាម៦៥ភាគរយទៀត ទទួលបាននិទ្ទេសមធ្យម៕
ប្រភព៖ PostKhmer
