ប្រទេសចិនបានដើរតួនាទីកាន់តែសំខាន់ក្នុងការក្លាយជាប្រភពផ្គត់ផ្គង់ទំនិញឱ្យកម្ពុជា ដោយនៅក្នុងត្រីមាសទី១ ឆ្នាំ២០២៦ កម្ពុជាបាននាំចូលទំនិញពីប្រទេសចិន ក្នុងទឹកប្រាក់ជិត ៤,៧ ពាន់លានដុល្លារ កើនឡើង ១/៤ ដងបើធៀបនឹងរយៈពេលដូចគ្នាក្នុងឆ្នាំ២០២៥។ ទឹកប្រាក់នេះ គឺស្មើនឹងជាងពាក់កណ្តាលនៃចំនួនទឹកប្រាក់ដែលកម្ពុជាបញ្ចេញសម្រាប់នាំចូលទំនិញពីគ្រប់ប្រទេសដៃគូពាណិជ្ជកម្មទាំងអស់លើពិភពលោក។
ទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងត្រីមាសទី១ ឆ្នាំ២០២៦ ការនាំចូល នាំចេញទំនិញរវាងប្រទេសកម្ពុជា និងចិន មានទឹកប្រាក់សរុបជិត ៥,១៦ ពាន់លានដុល្លារ កើនឡើង ២៦,៨% បើធៀបនឹងត្រីមាសទី១ ឆ្នាំ ២០២៥ ដែលមាន ៤,០៧ ពាន់លានដុល្លារ។ ក្នុងចំនួននេះ គឺទំនិញកម្ពុជានាំទៅប្រទេសចិន មានទឹកប្រាក់ ៤៥៩,៤៦ លានដុល្លារ កើន ៣២% ចំណែកទំនិញចិននាំចូលមកវិញ ៤,៥ ពាន់លានដុល្លារ កើន ២៦,៣%។ ផ្អែកតាមទិន្នន័យខាងលើ គឺជញ្ជីងពាណិជ្ជកម្មកម្ពុជា មានឱនភាពរហូតដល់ ៤,២៤ ពាន់លានដុល្លារ ខណៈកាលពីត្រីមាសទី១ ឆ្នាំ ២០២៥ មានចំនួន ៣,៣៧ ពាន់លានដុល្លារ។
ទឹកប្រាក់ដែលកម្ពុជាបញ្ចេញទៅលើការនាំចូលទំនិញពីប្រទេសចិន គឺស្មើនឹង ៥៣,១៦% នៃចំនួនទឹកប្រាក់សរុបដែលកម្ពុជាបានបញ្ចេញលើការនាំចូលទំនិញពីបណ្តាដៃគូពាណិជ្ជកម្មទាំងអស់ក្នុងត្រីមាសទី១ ឆ្នាំ២០២៦ ដែលមាន ៨,៨៣ ពាន់លានដុល្លារ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ថា លក្ខខណ្ឌទីតាំងភូមិសាស្រ្ត ភាពល្អប្រសើរនៃទំនាក់ទំនងការទូត ព្រមទាំងភាពជាដៃគូរវាងកម្ពុជា-ចិន ក្នុងកិច្ចព្រមព្រៀងពាណិជ្ជកម្មសេរីទ្វេភាគី(FTA) និងពហុភាគី RCEP បានធ្វើឱ្យប្រទេសចិនក្លាយជាអ្នកផ្គត់ផ្គង់ទំនិញធំបំផុតឱ្យកម្ពុជា។ លោកបន្តថា ម្យ៉ាងទៀតនៅកម្ពុជាបច្ចុប្បន្នក៏មានវិនិយោគិនចិនជាច្រើនកំពុងបើករោងចក្រ/សហគ្រាស ដែលការណ៍នេះជំរុញឱ្យមានការនាំចូលទំនិញជាប្រភេទវត្ថុធាតុដើម ឬគ្រឿងផ្សំជាច្រើនពីប្រទេសចិនមកចូលរោងចក្រ/សហគ្រាសកែច្នៃបន្តនៅកម្ពុជា។
លោកបានថ្លែងថា៖«បើយើងមើលទៅជញ្ជីងពាណិជ្ជកម្ម គឺកម្ពុជាពិតជាមានឱនភាពច្រើន ប៉ុន្តែចំណុចនេះវាមិនមែនជាក្តីបារម្ភនោះទេ ព្រោះផលិតផលដែលកម្ពុជានាំចូលមកពីប្រទេសចិន គឺភាគច្រើនត្រូវបានយកទៅចូលក្នុងរោងចក្រ/សហគ្រាសដើម្បីកែច្នៃសម្រាប់នាំចេញទៅលក់បន្តនៅទីផ្សារប្រទេសផ្សេងៗទៀត»។
ទំនិញសំខាន់ៗដែលកម្ពុជានាំចូលមកពីប្រទេសចិន រួមមាន វត្ថុធាតុដើមសម្រាប់រោងចក្រ សហគ្រាស ផលិតផលប្រើប្រាស់ប្រចាំថ្ងៃ អាហារ ភេសជ្ជៈ រថយន្ត គ្រឿងម៉ាស៊ីន គ្រឿងសំណង់ និងគ្រឿងអគ្គិសនី-អេឡិចត្រូនិក។ ចំណែកទំនិញកម្ពុជានាំទៅប្រទេសចិនភាគច្រើនជាផលិតផលកសិកម្ម គ្រឿងសង្ហារឹម និងផលិតផលវាយនភណ្ឌ។
របាយការណ៍ក្រុមប្រឹក្សាអភិវឌ្ឍន៍កម្ពុជា(CDC) បានបង្ហាញថា ក្នុងឆ្នាំ២០២៥ ការវិនិយោគមកពីប្រទេសចិន ស្ថិតនៅលំដាប់លេខទី១ ដែលបានរួមចំណែកប្រមាណ ៥៤,២៥% នៃទុនវិនិយោគសរុបនៅក្នុងប្រទេសកម្ពុជាចំនួន ១០ ពាន់លានដុល្លារ។ ចំណែកវិនិយោគិនកម្ពុជា ស្ថិតនៅលំដាប់លេខរៀងទី២ ដែលបានរួមចំណែកប្រមាណ ៣១,២៧% និងសិង្ហបុរី ស្ថិតនៅលេខរៀងទី៣ រួមចំណែក ៥,៩៩%។ ទិន្នន័យរបស់ GDCE ឱ្យដឹងថា ក្នុងឆ្នាំ២០២៥ ការនាំចូល នាំចេញទំនិញរវាងប្រទេសកម្ពុជា និងចិន មានទឹកប្រាក់សរុប ១៩,៧៣ ពាន់លានដុល្លារ កើន ២៩,៩%បើធៀបនឹងឆ្នាំ ២០២៤។ ក្នុងចំនួននេះ គឺទំនិញចិននាំមកកម្ពុជា មានចំនួន ១៨,០៤ ពាន់លានដុល្លារ កើនឡើង ៣៤,៣ ភាគរយ ចំណែកទំនិញកម្ពុជានាំទៅប្រទេសចិន ១,៦៨ ពាន់លានដុល្លារ ថយចុះ ៣,៦%៕
ប្រភព៖ PostKhmer
