តើអនាគតប្រធានាធិបតីកូរ៉េខាងត្បូងនឹងទៅជាយ៉ាងណាបន្ទាប់ពីការសម្រេចចោទប្រកាន់ពីរដ្ឋសភា?
ការបោះឆ្នោតរបស់រដ្ឋសភាកូរ៉េខាងត្បូងដើម្បីអនុម័តលើការចោទប្រកាន់ប្រធានាធិបតីYoon Suk-yeolគឺជាចំណុចកំពូលនៃវិបត្តិនយោបាយ ដែលផ្តើមចេញពីការដាក់ច្បាប់អាជ្ញាសឹកភ្លាមៗរបស់លោកនៅល្ងាចថ្ងៃទី ៣ខែធ្នូ។ប្រធានាធិបតី Yoon Suk-yeol ត្រូវបានព្យួរពីតំណែង បន្ទាប់ពីសមាជិកយ៉ាងហោចណាស់១២នាក់នៃគណបក្សអំណាចប្រជាជន(PPP)ដែលកំពុងកាន់អំណាចបានបោះឆ្នោតគាំទ្រការចោទប្រកាន់លោកចំពេលលោកបដិសេធមិនព្រមលាលែងពីតំណែង។ទោះបីជាយ៉ាងណាជោគវាសនារបស់អ្នកនយោបាយរូបនេះមិនទាន់សម្រេចនៅឡើយទេ។
ផ្លូវវែងឆ្ងាយទៅកាន់ការចោទប្រកាន់ជាផ្លូវការ
យោងតាមទូរទស្សន៍CNNការបោះឆ្នោតអនុម័តលើសំណើចោទប្រកាន់ដោយសភាជាតិកូរ៉េនៅថ្ងៃទី១៤ខែធ្នូគ្រាន់តែជាជំហានដំបូងក្នុងដំណើរការដ៏វែងឆ្ងាយនិងលំបាកក្នុងការបញ្ចប់អាណត្តិប្រធានាធិបតីរបស់លោក Yoonជាផ្លូវការ។ចំណាត់ការបន្ទាប់គឺអាស្រ័យលើតុលាការធម្មនុញ្ញដែលឥឡូវនេះមានពេលរហូតដល់១៨០ថ្ងៃដើម្បីសម្រេចថាតើត្រូវបន្តឬបដិសេធការបោះឆ្នោតចោទប្រកាន់។ ក្នុងពេលនោះនាយករដ្ឋមន្ត្រីHan Duck-soo កាន់តួនាទីជាប្រធានាធិបតីស្តីទី។តុលាការបានជួបប្រជុំជាលើកដំបូងដើម្បីពិភាក្សាអំពីករណីលោកYoon នៅថ្ងៃទី ១៦ ខែធ្នូ ហើយបានប្រកាសពីគម្រោងបើកសវនាការបឋមលើកដំបូងនៅថ្ងៃទី២៧ខែធ្នូ។ តុលាការបានប្រកាសថាខ្លួននឹងចាត់ទុកករណីនេះជា “អាទិភាពកំពូល” ក្នុងចំណោមសំណុំរឿងចោទប្រកាន់ជាច្រើនដែលត្រូវបានជំរុញដោយក្រុមប្រឆាំងនឹងរដ្ឋបាលYoon រួមទាំងការផ្តោតទៅលើអគ្គមេធាវី ព្រះរាជអាជ្ញានិងព្រះរាជអាជ្ញាជាន់ខ្ពស់ផ្សេងទៀត។ក្នុងឆ្នាំ២០១៦ តុលាការធម្មនុញ្ញបានចំណាយពេល៣ខែដើម្បីធ្វើការសម្រេចចិត្តបណ្តេញលោកស្រីPark Geun-hye ដែលជាមេដឹកនាំស្ត្រីដំបូងគេ និងជាប្រធានាធិបតីដែលកំពុងអង្គុយរបស់កូរ៉េខាងត្បូងដែលត្រូវបានដកចេញពីតំណែងតាមរយៈការចោទប្រកាន់។ លោកស្រីParkត្រូវបានតុលាការកាត់ទោសឱ្យជាប់ពន្ធនាគាររយៈពេល២០ ឆ្នាំពីបទពុករលួយ និងបំពានអំណាច។ប៉ុន្តែក្រោយមកត្រូវបានលើកលែងទោស។
ប្រធានាធិបតីមុនម្នាក់ទៀតលោក Roh Moo-hyun បានយកឈ្នះលើការប្រឈមមុខនឹងការចោទប្រកាន់នៅឆ្នាំ២០០៤នៅពេលដែលតុលាការធម្មនុញ្ញបានច្រានចោលការផ្លាស់ប្តូរនេះបន្ទាប់ពីមានការពិភាក្សាអស់រយៈពេល២ខែ។លោកRohក្រោយមកបានបន្តធ្វើជាប្រធានាធិបតីរហូតដល់ចប់អាណត្តិ៥ឆ្នាំ។លើកនេះ ការពិចារណារបស់តុលាការធម្មនុញ្ញអំពីអនាគតរបស់លោកYoon នឹងកាន់តែស្មុគស្មាញ ដោយសារកត្តាមួយទៀត។តុលាការដែលមានសមាជិក៩នាក់បច្ចុប្បន្នមានចៅក្រមតែ៦រូបប៉ុណ្ណោះដោយសារតែការពន្យារពេលក្នុងការបំពេញតំណែងទំនេរចំនួន៣ដែលបន្សល់ទុកដោយចៅក្រមចូលនិវត្តន៍។យោងតាមរដ្ឋធម្មនុញ្ញរបស់ប្រទេសការចោទប្រកាន់នឹងធ្វើឡើងជាផ្លូវការនៅពេលដែលចៅក្រមយ៉ាងហោចណាស់៦រូបបានអនុម័តដំណើរការនេះ។នេះមានន័យថា ចៅក្រមទាំងអស់នៃតុលាការបច្ចុប្បន្ននឹងបោះឆ្នោតជាឯកច្ឆ័ន្ទលើការចោទប្រកាន់ដើម្បីបណ្តេញលោកYoon ចេញពីតំណែងជាផ្លូវការ លុះត្រាតែចៅក្រមថ្មីបំពេញមុខតំណែងដែលនៅទំនេរនៅប៉ុន្មានសប្តាហ៍ខាងមុខនេះ។គណបក្សកាន់អំណាចនិងគណបក្សប្រឆាំង មានបំណងតែងតាំងចៅក្រមដែលទាំងបីរូប នៅចុងខែនេះ។
ប្រសិនបើតុលាការធម្មនុញ្ញរក្សាការចោទប្រកាន់នេះ លោក Yoon នឹងក្លាយជាប្រធានាធិបតីដែលកាន់តំណែងខ្លីបំផុតក្នុងប្រវត្តិសាស្ត្រកូរ៉េ។ បន្ទាប់មកប្រទេសនេះនឹងត្រូវរៀបចំការបោះឆ្នោតដំបូងក្នុងរយៈពេល៦០ថ្ងៃដើម្បីស្វែងរកអ្នកជំនួសលោក។
ការស៊ើបអង្កេតជាបន្តបន្ទាប់ទៅលើការបះបោរដែលត្រូវបានចោទប្រកាន់
ទោះបីជាលោកប្រធានាធិបតី Yoonត្រូវបានព្យួរពីតំណែងក៏ដោយ ។ប៉ុន្តែលោកមិនត្រូវបានបណ្តេញចេញជាផ្លូវការនោះទេ។ នោះមានន័យថាលោកនៅតែមានអភ័យឯកសិទ្ធិប្រធានាធិបតីពីការចោទប្រកាន់ព្រហ្មទណ្ឌភាគច្រើនលើកលែងតែការបះបោរឬក្បត់ជាតិ។
ប៉ូលីសសភាអយ្យការនិងទីភ្នាក់ងារប្រឆាំងអំពើពុករលួយរបស់ប្រទេសកូរ៉េខាងត្បូងបានបើកការស៊ើបអង្កេតដាច់ដោយឡែកពីគ្នាលើលោកYoon ជុំវិញការចោទប្រកាន់ពីបទក្បត់ជាតិទាក់ទងនឹងការប្រកាសច្បាប់អាជ្ញាសឹកនៅល្ងាចដ៏ខ្លីនៃថ្ងៃទី៣ខែធ្នូ។ក្រុមស៊ើបអង្កេតរួមគ្នា រួមមានប៉ូលីស ភ្នាក់ងារប្រឆាំងអំពើពុករលួយនិងក្រសួងការពារជាតិបានចោទប្រកាន់លោកYoonពីបទរំលោភអំណាចនិង”ដឹកនាំការបះបោរ”ជាឧក្រិដ្ឋកម្មដែលអាចមានទោសប្រហារជីវិត។មន្ត្រីម្នាក់បានបង្ហើបប្រាប់ប្រព័ន្ធផ្សព្វផ្សាយថានៅថ្ងៃទី១៦ខែធ្នូក្រុមស៊ើបអង្កេតបានព្យាយាមផ្ញើសេចក្តីជូនដំណឹងមួយស្នើសុំឱ្យលោកYoon បង្ហាញខ្លួនដើម្បីសាកសួរនៅថ្ងៃទី១៨ ខែធ្នូ ។ប៉ុន្តែការិយាល័យប្រធានាធិបតីបដិសេធមិនបញ្ជូនបន្តសំណើនេះ។
កន្លងមកនៅថ្ងៃទី១៥ ខែធ្នូ លោក Yoon មិនអើពើនឹងការកោះហៅដើម្បីសាកសួរពីព្រះរាជអាជ្ញាដែលកំពុងបើកការស៊ើបអង្កេតដោយឡែក។ អយ្យការបានធ្វើសំណើលើកទី២នៅថ្ងៃទី១៦ ខែធ្នូ។ប៉ុន្តែមិនបានផ្សព្វផ្សាយជាសាធារណៈនៅពេលដែលលោកYoon ត្រូវចូលខ្លួនទេ។
កាលពីសប្តាហ៍មុន លោក Oh Dong-woon ប្រធានការិយាល័យស៊ើបអង្កេតអំពើពុករលួយកម្រិតខ្ពស់របស់ប្រទេសកូរ៉េខាងត្បូងបានប្រកាសថាទីភ្នាក់ងារនឹងស្វែងរកចាប់ខ្លួនលោកYoon ប្រសិនបើលក្ខខណ្ឌត្រូវបានបំពេញ។នៅថ្ងៃដដែលនោះប៉ូលីសបានព្យាយាមលបឆ្មក់ចូលការិយាល័យប្រធានាធិបតី។ប៉ុន្តែត្រូវបានរារាំងមិនឱ្យចូល។វាមិនច្បាស់ទេថាតើលោកYoonនឹងបញ្ចប់ក្នុងស្ថានភាពស្រដៀងគ្នានឹងអតីតរដ្ឋមន្ត្រីការពារជាតិKim Yong-hyun ដែលត្រូវបានចាប់ខ្លួនដោយរដ្ឋអាជ្ញាកាលពីសប្តាហ៍មុនពីបទចោទប្រកាន់ថាលោកប្រធានាធិបតីដាក់ច្បាប់អាជ្ញាសឹកនិងលាលែងពីតំណែងដោយសារតែរឿងអាស្រូវនេះ។លោកKimថែមទាំងព្យាយាមធ្វើអត្តឃាតក្នុងឃុំខ្លួនទៀតផង៕ឌុំសាវុន
