កាលពីម្សិលមិញមេដឹកនាំអាស៊ានព្រមទាំងប្រទេសនិងស្ថាប័នជាដៃគូ បានប្រមូលផ្តុំគ្នានៅមជ្ឈមណ្ឌលសន្និបាតជាតិក្នុងទីក្រុងវៀងចន្ទន៍ រដ្ឋធានីប្រទេសឡាវសម្រាប់ពិធីបើកកិច្ចប្រជុំកំពូលអាស៊ានលើកទី៤៤និង៤៥ និងកិច្ចប្រជុំពាក់ព័ន្ធ។សម្តេចនាយករដ្ឋមន្ត្រី ហ៊ុន ម៉ាណែត រួមជាមួយនឹងប្រមុខរដ្ឋ និងរដ្ឋាភិបាលអាស៊ានដទៃទៀត បានចូលរួមក្នុងបណ្តាកិច្ចប្រជុំជាបន្តបន្ទាប់ក្នុងរយៈពេល៣ថ្ងៃ ដែលជាផ្នែកនៃកិច្ចប្រជុំកំពូលរបស់សមគមអន្តររដ្ឋាភិបាលក្នុងតំបន់នេះ ពិធីនេះប្រព្រឹត្តទៅក្រោមអធិបតីភាពលោក សនសៃ ស៊ីផាន់ដន (Sonexay Siphandone) នាយករដ្ឋមន្ត្រីឡាវ និងជាប្រធានប្តូរវេនអាស៊ានសម្រាប់ឆ្នាំ ២០២៤ មានការអញ្ជើញចូលរួមពីនាយករដ្ឋមន្ត្រីកម្ពុជា សម្តេចហ៊ុន ម៉ាណែត មេដឹកនាំអាស៊ាន ដៃគូសន្ទនា រដ្ឋមន្ត្រីការបរទេសអាស៊ាន និងភ្ញៀវកិត្តិយសជាច្រើនរូបទៀត។
កិច្ចប្រជុំកំពូលនេះបានឃើញការចូលរួមរបស់មេដឹកនាំដែលទើបតែងតាំងថ្មីពីររូបគឺលោកនាយករដ្ឋមន្ត្រី Shigeru Ishiba របស់ជប៉ុន និងលោកស្រីនាយករដ្ឋមន្ត្រី Paetongtarn Shinawatra របស់ប្រទេសថៃ។រដ្ឋមន្ត្រីក្រសួងការបរទេសរបស់សហរដ្ឋអាមេរិកលោក Antony Blinken នឹងតំណាងឱ្យសហរដ្ឋអាមេរិកនៅក្នុងកិច្ចប្រជុំកំពូលនេះ ខណៈដែលនាយករដ្ឋមន្ត្រីចិនលោក Li Qiang នឹងចូលរួមកិច្ចប្រជុំនេះក្នុងនាមសាធារណរដ្ឋប្រជាមានិតចិន ។នេះជាលើកដំបូងក្នុងរយៈពេល៣ឆ្នាំ ដែលមីយ៉ាន់ម៉ាបានបញ្ជូនតំណាងរបស់ខ្លួន ដែលជាមន្ត្រីក្រសួងការបរទេសជាន់ខ្ពស់មួយរូបទៅចូលរួមកិច្ចប្រជុំកំពូលអាស៊ាន។
ក្នុងសុន្ទរកថាបើកកម្មវិធី នាយករដ្ឋមន្ត្រីឡាវ លោក សនសៃ ស៊ីផាន់ដន បានសង្កត់ធ្ងន់ថា អាស៊ានបានបន្តពង្រឹងតួនាទី និងជំហររបស់ខ្លួន ហើយបានប្រែក្លាយខ្លួនទៅជាអង្គការអន្តររដ្ឋាភិបាលដែលមានការទទួលស្គាល់យ៉ាងទូលំទូលាយ ដែលកំពុងទាក់ទាញចំណាប់អារម្មណ៍ពីដៃគូខាងក្រៅ។
លោកបានមានប្រសាសន៍ថា៖ «ដៃគូសន្ទនារបស់យើងនៅតែប្រកាន់ខ្ជាប់នូវការគាំទ្ររបស់ពួកគេចំពោះភាពជាកណ្តាលអាស៊ាននៅក្នុងស្ថាបត្យកម្មក្នុងតំបន់ដែលកំពុងវិវត្ត រួមទាំងទស្សនវិស័យអាស៊ានស្តីពីឥណ្ឌូប៉ាស៊ីហ្វិកផងដែរ។ ទន្ទឹមនឹងនោះ មានការកើនឡើងកាន់តែខ្លាំងនៃចំនួនប្រទេស និងអង្គការក្នុងតំបន់ ដែលកំពុងចូលរួមជាមួយអាស៊ានក្នុងសមត្ថភាពផ្សេង»។តាងនាមឱ្យប្រទេសឡាវ និងប្រជាជនឡាវ លោកបានបង្ហាញជំនឿយ៉ាងមុតមាំថា សមិទ្ធផលរបស់អាស៊ានឈរយ៉ាងរឹងមាំលើការជឿទុកចិត្តគ្នាទៅវិញទៅមក ការគាំទ្រ និងកិច្ចសហប្រតិបត្តិការក្នុងចំណោមរដ្ឋសមាជិក ដែលដឹកនាំដោយ «វិថីអាស៊ាន» និងគោលការណ៍ជាមូលដ្ឋានរបស់អាស៊ាន។បន្ទាប់ពីពិធីបើកសម្តេចនាយករដ្ឋមន្ត្រី ហ៊ុន ម៉ាណែត បានចូលរួមទាំងសម័យប្រជុំពេញអង្គនៃកិច្ចប្រជុំកំពូលអាស៊ានលើកទី៤៤ និងកិច្ចប្រជុំចង្អៀតនៃកិច្ចប្រជុំកំពូលអាស៊ានលើកទី៤។ក្នុងឱកាសនោះ អគ្គលេខាធិការអាស៊ាន លោក កៅ គឹមហួន បានធ្វើបទបង្ហាញរបាយការណ៍វឌ្ឍនភាពឆ្នាំ ២០២៤ ស្តីពីការកសាងសហគមន៍អាស៊ានដល់មេដឹកនាំក្នុងតំបន់ ដោយសង្កត់ធ្ងន់លើសមិទ្ធិផលសំខាន់ៗក្រោមការដឹកនាំអាស៊ានរបស់ឡាវ ដែលប្រតិបត្តិការក្រោមប្រធានបទ «ការលើកកម្ពស់ការតភ្ជាប់ និងភាពធន់»។
លើសពីនេះ បណ្តាមេដឹកនាំអាស៊ានក៏គ្រោងនឹងជួបជាមួយតំណាងមកពី AIPA, ASEAN-BAC និងយុវជនអាស៊ានផងដែរ។
ការពិភាក្សាពីទំនាក់ទំនងសេដ្ឋកិច្ច និងសន្តិសុខក្នុងតំបន់ត្រូវបានគេរំពឹងថានឹងគ្របដណ្តប់លើកិច្ចប្រជុំកំពូលអាស៊ានលើកទី ៤៤ និង ៤៥ ។ ទោះជាយ៉ាងណាក៏ដោយ ក្រុមអ្នកជំនាញជឿថា ជាមួយនឹងការប្រឈមមុខនឹងប្រធានបទសំខាន់នៅពេលបច្ចុប្បន្ន ដូចជាការបោះឆ្នោតប្រធានាធិបតីអាមេរិកនាពេលខាងមុខ និងសង្គ្រាមអ៊ីស្រាអែល និងក្រុមហាម៉ាស់ គេមិនរំពឹងនោះទេថាកិច្ចប្រជុំកំពូលនេះនឹងផ្តល់លទ្ធផលគួរឱ្យកត់សម្គាល់លើបញ្ហាតំបន់ដែលកើតមានជាយូរមកហើយដូចជា ជម្លោះសមុទ្រចិនខាងត្បូង និងវិបត្តិមនុស្សជាតិនៅមីយ៉ាន់ម៉ា។
លោក ឆេង គឹមឡុង ប្រធានវិទ្យាស្ថានទស្សនវិស័យអាស៊ី (AVI) មានប្រសាសន៍ថា៖ «អ្វីដែលខ្ញុំអាចទាយទុកជាមុនបានបំផុតគឺ ប្រទេសសមាជិកអាស៊ានគ្រាន់តែចេញសេចក្តីថ្លែងការណ៍មួយទៀតអំពាវនាវឱ្យមានដំណោះស្រាយដោយសន្តិវិធីក្នុងចំណោមភាគីជម្លោះប៉ុណ្ណោះ»៕សហការី
