នាយករដ្ឋមន្ត្រីជំរុញឱ្យពលរដ្ឋទៅលេងកម្សាន្តនៅខេត្ត៤ស្ថិតក្នុងតំបន់ត្រីកោណ
ថ្លែងក្នុងពិធីសំណេះសំណាល និងពិសាភោជនាហារសាមគ្គីនៃមហាគ្រួសារសមាគមឧកញ៉ាកម្ពុជានិងសមាគមអ្នកអភិវឌ្ឍន៍លំនៅឋានកម្ពុជា នាល្ងាចថ្ងៃទី០២ ខែសីហា ឆ្នាំ២០២៤ សម្តេចធិបតីហ៊ុន ម៉ាណែតនាយករដ្ឋមន្ត្រីកម្ពុជាបានជំរុញឱ្យប្រជាពលរដ្ឋកម្ពុជានាំគ្នាទៅលេងកម្សាន្ដនៅក្នុងខេត្ដ៤ចំនួនស្ថិតនៅភាគឦសានដែលជាគម្រោងតំបន់អភិវឌ្ឍន៍ត្រីកោណដើម្បីជំរុញសេដ្ឋកិច្ចនិងទេសចរណ៍នៅទីនោះឱ្យកាន់តែច្រើន។សម្តេចហ៊ុន ម៉ាណែត បានថ្លែងថា៖ «សូមបងប្អូនដែលឈឺឆ្អាលរឿងជាតិដែលទាំងអ្នកគាំទ្រ និងអ្នកមិនគាំទ្រ សូមបញ្ជេញមតិដោយស្មារតីយោគយល់គ្នា គោរពគ្នាទៅវិញទៅមក។ កុំធ្វើអ្វីដែលជ្រុលប៉ះពាល់ដល់សន្តិភាព ធ្វើឱ្យខាតបង់ប្រយោជន៍របស់យើងឱ្យសោះ។ បើស្រឡាញ់ខេត្តទាំង៤នេះនិងព្រួយបារម្ភសូមនាំគ្នាទៅលេងខេត្ត៤នេះឱ្យច្រើន ទៅមើលខេត្តនេះឱ្យច្រើន ទៅមើលដើម្បីជំរុញសេដ្ឋកិច្ច ទេសចរណ៍នៅទីនោះឱ្យច្រើន ដើម្បីបងប្អូនចូលរួមផ្ទាល់»។
សម្តេចនាយករដ្ឋមន្ត្រីបានលើកឡើងថា បើខ្លាចបាត់ខ្លាំងសូមនាំគ្នាទៅមើលដើរលេងឱ្យបានច្រើន ដែលជាចំណុចនេះជាការល្អមួយ។ សម្តេចក៏បានអំពាវនាវដល់សមាគមឧកញ៉ា សមាជិកសភាពាណិជ្ជកម្ម អ្នកវិនិយោគកម្ពុជាទាំងអស់រួមគ្នាតម្រង់ទិស អាទិភាពមួយក្នុងការគិតពីការវិនិយោគរបស់ខ្លួនរួមគ្នាទៅវិនិយោគនៅទិសឦសាន ដើម្បីឱ្យខេត្តទាំង៤ នោះកាន់តែរីកចម្រើនខ្លាំង។សម្តេច ហ៊ុន ម៉ាណែត បានសង្កត់ធ្ងន់ថា៖ «បង្កើនមនុស្សតាមរយៈ២ចំណុច គឺទី១៖ អ្នកដែលនៅទីនោះមានកូនចៅច្រើន ទី២៖ បង្កើនសេដ្ឋកិច្ចវិនិយោគនៅទីនោះឱ្យច្រើន »។ក្នុងឱកាសនោះដែរ សម្តេចបានបញ្ជាក់ផងដែរថា បើស្រឡាញ់ទឹកដី យើងរួមគ្នា កសាងប្រទេសរបស់យើង ថែរក្សាទឹកដីរបស់យើង បើស្រឡាញ់ជាតិពិតប្រាកដរួមគ្នាធ្វើអំពើវិជ្ជមាន ដើម្បីថែរក្សាខេត្តទាំង៤ ជំរុញសេដ្ឋកិច្ច ជំរុញការអភិវឌ្ឍខេត្តទាំង៤នេះ ជាមួយរាជរដ្ឋាភិបាល៕
