កម្ពស់ទឹកស្ទឹងសែនបានឡើងដល់កម្រិតប្រកាសអាសន្ន១៣.៥១ម៉ែត្រ ពោលគឺលើសកម្រិតប្រកាសអាសន្ន១៣.៥០ម៉ែត្រ។នេះបើតាមឲ្យប្រកាសដឹងពីរដ្ឋបាលខេត្តកំពង់ធំ។អាជ្ញាធរមូលដ្ឋានបានក្រើនរំលឹកប្រជាពលរដ្ឋរស់នៅតាមដងស្ទឹងឱ្យមានការប្រុងប្រយ័ត្នខ្ពស់។
ក្នុងសេចក្តីប្រកាសព័ត៌មានដែលចេញផ្សាយកាលពីម្សិលមិញ រដ្ឋបាលខេត្តបានអំពាវនាវដល់ប្រជាពលរដ្ឋក្នុងខេត្តកំពង់ធំទាំងអស់ និងពលរដ្ឋដែលរស់នៅតាមបណ្តោយដងស្ទឹងសែន។ជាពិសេសអ្នករស់នៅតំបន់ងាយរងគ្រោះ បង្កើនការប្រុងប្រយ័ត្នខ្ពស់ ដោយហាមកូនចៅតូចៗកុំឱ្យចុះលេងទឹក និងត្រូវត្រៀមរៀបចំទុកដាក់សម្ភារ ឯកសារសំខាន់ៗដែលចាំបាច់ឱ្យបានត្រឹមត្រូវ។អាជ្ញាធរមូលដ្ឋានត្រូវយកចិត្តទុកដាក់ក្នុងការត្រៀមរៀបចំផែនការអន្តរាគមន៍ និងត្រៀមរៀបចំទីទួលសុវត្ថិភាពឱ្យបានសមរម្យក្នុងការជម្លៀសប្រជាពលរដ្ឋទៅទីទួលសុវត្ថិភាព ម្យ៉ាងវិញទៀត ត្រូវធ្វើការផ្សព្វផ្សាយ ណែនាំឱ្យប្រជាពលរដ្ឋយកចិត្តទុកដាក់លើសុខភាពអនាម័យ ដើម្បីជៀសវាងជំងឺឆ្លងផ្សេងៗក្នុងអំឡុងពេលដែលមានគ្រោះទឹកជំនន់។រដ្ឋបាលខេត្តកំពង់ធំ បានអំពាវនាវដល់ប្រជាពលរដ្ឋ ចូលរួមសហការជាមួយអាជ្ញាធរ ដើម្បីធានាបាននូវការជួយសង្រោ្គះទាន់ពេលវេលា និងមានប្រសិទ្ធភាពចំពោះគ្រោះមហន្តរាយដែលអាចកើតមាន។លោក នួន ផារ័ត្ន ភិបាលខេត្តកំពង់ធំ បានដឹកនាំក្រុមការងារចុះពិនិត្យស្ថានភាពទឹកជំនន់នៅឃុំព្រៃគុយ និងឃុំកំពង់ស្វាយ ដែលផ្ទៃដីស្រែចំនួន ១.១០៨ ហិកតា បានរងការប៉ះពាល់យ៉ាងធ្ងន់ធ្ងរ ក្នុងនោះ ៩៩៦ ហិកតា ត្រូវបានបំផ្លាញទាំងស្រុង។ ដំណាំនិងហេដ្ឋារចនាសម្ព័ន្ធផ្សេងទៀតក៏បានរងការខូចខាតផងដែរ។លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ធំ មិនអាចទាក់ទងសុំការអត្ថាធិប្បាយបានទេ ខណៈលោកបានកំពុងជាប់ប្រជុំ។ទោះជាយ៉ាងនេះក្តី លោកធ្លាប់បានរាយការណ៍ប្រាប់សារព័ត៌មានក្នុងស្រុកថា ស្រុកចំនួន៧ រួមមាន ស្រុកកំពង់ស្វាយ ប្រាសាទសំបូរ ស្រុកសណ្តាន់ បារាយណ៍ សន្ទុក ស្ទោង និងក្រុងស្ទឹងសែន រងគ្រោះ ដោយទឹកជំនន់ ប៉ះពាល់ផ្ទៃដីស្រែចំនួន ១៧១៣ ហិកតា និងបំផ្លាញដល់ទៅ ១១៨២ ហិកតា ដោយឡែកស្រុកកំពង់ស្វាយ រងគ្រោះខ្លាំងជាងគេ។ស្ថានភាពកាន់តែអាក្រក់ទៅៗ ដោយសារភ្លៀងធ្លាក់ខ្លាំង ផ្គរ រន្ទះ និងខ្យល់កន្ត្រាក់ បើយោងតាមការព្យាករណ៍របស់ក្រសួងធនធានទឹក និងឧតុនិយម។ក្រសួងធនធានទឹកបានព្យាករណ៍ថា ចាប់ពីថ្ងៃម្សិលមិញ ដល់ថ្ងៃអង្គារ ភ្លៀងនឹងបន្តធ្លាក់ពាសពេញតំបន់ទំនាប គ្របដណ្តប់ ១៥ភាគរយ នៃតំបន់ ជាមួយនឹងស្ថានភាពស្រដៀងគ្នានេះ ត្រូវបានគេរំពឹងថា នឹងកើតមាននៅតំបន់ខ្ពង់រាប និងតំបន់ឆ្នេរ ដោយសារឥទ្ធិពលចុះខ្សោយនៃព្យុះទីហ្វុង Gaemi លើសមុទ្រចិនខាងត្បូង៕ Khmer Times
