កិច្ចប្រជុំរដ្ឋមន្ត្រីការបរទេសអាស៊ានជាមួយសហរដ្ឋអាមេរិកបានរំលឹកឡើងវិញនូវជោគជ័យនៃកិច្ចប្រជុំកំពូលពិសេសអាស៊ាន-សហរដ្ឋអាមេរិក នៅរដ្ឋធានីវ៉ាស៊ីនតោនដើម្បីរំលឹកខួបអនុស្សាវរីយ៍លើកទី៤៥និងការបង្កើតភាពជាដៃគូយុទ្ធសាស្ត្រ គ្រប់ជ្រុងជ្រោយអាស៊ាន-សហរដ្ឋអាមេរិក នាឱកាសកិច្ចប្រជុំកំពូលអាស៊ាន-សហរដ្ឋអាមេរិកលើកទី ១០ នៅឆ្នាំ២០២២។យោងតាមសេចក្តីប្រកាសព័ត៌មាន ស្តីពីលទ្ធផលនៃកិច្ចប្រជុំខាងលើ កាលពីថ្ងៃទី២៧ ខែកក្កដានេះ បានឱ្យដឹងថា កិច្ចប្រជុំបានបញ្ជាក់សារឡើងវិញនូវការប្តេជ្ញាចិត្តក្នុងការពង្រឹងទំនាក់ទំនង សេដ្ឋកិច្ចអាស៊ាន-សហរដ្ឋអាមេរិក រួមមាន តាមរយៈការអនុវត្តផែនការការងារកិច្ចព្រមព្រៀងក្របខ័ណ្ឌពាណិជ្ជកម្ម និងវិនិយោគអាស៊ាន-សហរដ្ឋអាមេរិក (TIFA) និងផែនការការងារពង្រីកទំនាក់ទំនងសេដ្ឋកិច្ច (E3) កម្មវិធីការតភ្ជាប់សហរដ្ឋអាមេរិក-អាស៊ាន ក៏ដូចជាតាមរយៈកិច្ចសន្ទនា និងទំនាក់ទំនងរបស់រដ្ឋមន្ត្រីសេដ្ឋកិច្ចអាស៊ាន (AEM) និងតំណាងពាណិជ្ជកម្មសហរដ្ឋអាមេរិក (USTR) ជាមួយក្រុមប្រឹក្សាធុរកិច្ចសហរដ្ឋអាមេរិក-អាស៊ាន(US-ABC)។
ក្នុងអង្គប្រជុំខាងលើ លោក សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា បានលើកឡើងពីសក្តានុពលដ៏អស្ចារ្យនៃការរួមចំណែកយ៉ាងសកម្មរបស់សហរដ្ឋអាមេរិក ក្នុងការអនុវត្តផែនការមេឌីជីថលអាស៊ានឆ្នាំ២០២៥ និងបានសង្កត់ធ្ងន់លើសារសំខាន់នៃការផ្សារភ្ជាប់គម្លាតឌីជីថលនៅក្នុងតំបន់ ដើម្បីធានាថាគ្មាននរណាម្នាក់ និងគ្មានកន្លែងណាមួយត្រូវបានទុកចោល។សេចក្តីប្រកាសព័ត៌មានដដែល បានបន្ថែមថា លោក សុខ ចិន្តាសោភា បានស្វាគមន៍កិច្ច សន្ទនាថ្នាក់រដ្ឋមន្ត្រីអាស៊ាន-សហរដ្ឋអាមេរិក ស្តីពីបរិស្ថាន និងបម្រែបម្រួលអាកាសធាតុលើក១ និង ការអនុម័តផែនការការងារបរិស្ថាន និងអាកាសធាតុអាស៊ាន-សហរដ្ឋអាមេរិក ព្រមទាំងបានលើកទឹកចិត្តឱ្យមានកិច្ចសហប្រតិបត្តិការក្នុងការលើកកម្ពស់ថាមពលកកើតឡើងវិញ ថាមពល បៃតង និងថាមពលបំភាយកាបូនទាប និងការធ្វើឱ្យប្រសើរឡើងនូវហេដ្ឋារចនាសម្ព័ន្ធថាមពល ប្រកបដោយ ចីរភាព តាមរយៈភាពជាដៃគូសាធារណៈ និងឯកជន។
លើសពីនេះលោក សុខ ចិន្តាសោភា បានបញ្ជាក់សារជាថ្មី ពីការត្រៀមខ្លួនរួចរាល់របស់កម្ពុជា ក្នុងការទទួលតួនាទីជាប្រទេសសម្របសម្រួលទំនាក់ទំនងដៃគូសន្ទនាអាស៊ាន-សហរដ្ឋអាមេរិក សម្រាប់អាណត្តិ២០២៤-២០២៧ ដើម្បីជំរុញភាពជាដៃគូយុទ្ធសាស្ត្រគ្រប់ជ្រុងជ្រោយនិងជំរុញទំនាក់ទំនងនេះឆ្ពោះទៅកាន់កម្រិតខ្ពស់បន្ថែមទៀត៕Khmer Times
