លោក Lai Ching-teបេក្ខជននៃគណបក្សប្រជាធិបតេយ្យ សេរីនិយម (DPP)ដែលកំពុងកាន់អំណាចបានឈ្នះការបោះឆ្នោតដឹកនាំនៅតៃវ៉ាន់(ប្រទេសចិន)នៅថ្ងៃទី១៣ខែមករា។យោងតាមទីភ្នាក់ងារព័ត៌មាន Reuters លោក Hou Yu-ih មកពីគណបក្សប្រឆាំង Kuomintang (KMT) និងអតីតអភិបាលក្រុងTaipei លោកKo Wen-je ដែលជាគូប្រជែង២រូបរបស់លោក Lai Ching-te ទាំង២បានទទួលស្គាល់ការបរាជ័យ។
លោក Lai Ching-te ទទួលបានសំឡេងគាំទ្រប្រហែល៤០% ខណៈដែលគូប្រជែងរបស់លោក Hou Yu-ih ទទួលបានប្រហែល៣៣% និង Ko Wen-je ទទួលបាន២៦% ។ យោងតាមការអាប់ដេតមុនរបស់គណៈកម្មាធិការរៀបចំការបោះឆ្នោត អត្រាអ្នកទៅបោះឆ្នោតចាប់ពីម៉ោង ៨:០០ព្រឹកដល់៤:០០ល្ងាច (ម៉ោងក្នុងស្រុក)គឺ ៦៩%។ មនុស្សជិត២០លាននាក់មានសិទ្ធិបោះឆ្នោតនៅក្នុងការបោះឆ្នោតនេះ។មេដឹកនាំតៃវ៉ាន់ថ្មី(ចិន) លោក Lai Ching-te អាយុ៦៤ឆ្នាំអាចប្រឈមមុខនឹងការងារដ៏លំបាកបំផុតរបស់លោកនៅពេលលោកចូលកាន់តំណែងនៅខែឧសភាខាងមុខ។លោក Lai បាននិយាយថា លោកបានប្តេជ្ញាចិត្តក្នុងការរក្សាសន្តិភាពនៅទូទាំងច្រកសមុទ្រតៃវ៉ាន់ និងពង្រឹងការការពាររបស់កោះនេះ។យោងតាមបទប្បញ្ញត្តិនៅតៃវ៉ាន់ អតីតមេដឹកនាំ Tsai Ing-wen មិនអាចឈរឈ្មោះសម្រាប់ការបោះឆ្នោតឡើងវិញបន្ទាប់ពី២អាណត្តិ។លោក Laiបានបម្រើការជាអនុមេដឹកនាំតៃវ៉ាន់មុនពេលឈរឈ្មោះជាអ្នកដឹកនាំ។ លោកបានបម្រើការជាប្រធានផ្នែកប្រតិបត្តិរបស់កោះនេះ ហើយក៏បានកាន់តំណែងនៅក្នុងសភានីតិបញ្ញត្តិរបស់តៃវ៉ាន់ផងដែរ។
ក្នុងអំឡុងយុទ្ធនាការបោះឆ្នោត លោក Lai បាននិយាយថា លោកនឹងបន្តគោលនយោបាយរបស់អតីតមេដឹកនាំ Tsai Ing-wen ក្នុងការចរចាជាមួយប្រទេសចិននិងរក្សាសន្តិភាពនិងស្ថានភាពរបស់កោះនេះ ខណៈពេលដែលសន្យាការពារតៃវ៉ាន់។លោក បញ្ជាក់ ជា ថ្មី ថា មាន តែ ប្រជាជន ទេ ដែល អាច សម្រេច អនាគត របស់ កោះ នេះ៕
