ប្រធានាធិបតីអ៊ុយក្រែនបាននិយាយថាគំនិតដែលថារុស្ស៊ីឈ្នះជម្លោះជិត២ឆ្នាំគឺគ្រាន់តែជា”អារម្មណ៍”ហើយទីក្រុងម៉ូស្គូកំពុងរងការខាតបង់យ៉ាងធ្ងន់ធ្ងរ។នេះ ជា ការ លើក ឡើង របស់ ប្រធានាធិបតី អ៊ុយក្រែនVolodymyr Zelensky ក្នុង បទសម្ភាសន៍ ជាមួយ ទស្សនាវដ្ដី Economist កាល ពី ថ្ងៃ ទី ១ ខែ មករា។ ទោះ ជា យ៉ាង ណាមេដឹកនាំ អ៊ុយក្រែន មិន បាន ផ្តល់ ភស្តុតាង នៃ ការ ខាតបង់ របស់រុស្ស៊ីទេ។លោកបាននិយាយថាអាទិភាពរបស់គៀវក្នុងឆ្នាំ២០២៤គឺដើម្បីបង្កើនការវាយប្រហារលើឧបទ្វីបគ្រីមៀដើម្បីកាត់បន្ថយចំនួនការវាយប្រហារលើអ៊ុយក្រែនក៏ដូចជាការពារទីក្រុងសំខាន់ៗនៅផ្នែកខាងមុខភាគខាងកើត។ឧបទ្វីបគ្រីមៀជាកម្មសិទ្ធិរបស់អ៊ុយក្រែន។ប៉ុន្តែត្រូវបានបញ្ចូលទៅក្នុងទឹកដីនៃសហព័ន្ធរុស្ស៊ីក្នុងឆ្នាំ២០១៤។លោក Zelenskyបានសារភាពថា “ប្រហែលជាយើងមិនទទួលបានជោគជ័យដូចនៅក្នុង២០២៣ដូចដែលយើងចង់បាននោះទេ។ ប្រហែលជាអ្វីៗមិនបានកើតឡើងលឿនដូចនរណាម្នាក់ស្រមៃទេ” ។
ប៉ុន្តែលោកបាននិយាយថាទស្សនៈដែលកងកម្លាំងរុស្ស៊ីឈ្នះគឺគ្រាន់តែជា “អារម្មណ៍”ហើយសំដៅទៅលើការចាញ់រុស្ស៊ីយ៉ាងធ្ងន់ធ្ងរនៅទីក្រុង Avdiivka ដែលលោកបានទៅទស្សនាកាលពីសប្តាហ៍មុន។
លោក Zelensky បាននិយាយថា”ទាហានរុស្ស៊ីរាប់ពាន់នាក់បានស្លាប់ គ្មាននរណាម្នាក់សូម្បីតែយកពួកគេចេញ” ។បច្ចុប្បន្ន រុស្ស៊ី មិន បាន ធ្វើ អត្ថាធិប្បាយ ជុំវិញ ព័ត៌មាន ខាង លើ នេះ ទេ។យោងតាមលោក Zelensky ផងដែរអ៊ុយក្រែនបានសម្រេច”សមិទ្ធផលដ៏អស្ចារ្យក្នុងការបំបែកការបិទផ្លូវរបស់រុស្ស៊ីនៅសមុទ្រខ្មៅនិងការនាំចេញគ្រាប់ធញ្ញជាតិតាមច្រករបៀងថ្មីមួយនៅតាមបណ្តោយឆ្នេរសមុទ្រភាគខាងត្បូង។លោក Zelensky បានសង្កត់ធ្ងន់ថាប្រសិនបើអ៊ុយក្រែនចាញ់រុស្ស៊ីអាចពង្រីកការវាយប្រហាររបស់ខ្លួនទៅកាន់ប្រទេសផ្សេងទៀត។
លោក បាន ច្រានចោល ទស្សនៈ ដែល ថា ក្រុង ម៉ូស្គូ ចង់ ចរចា ព្រោះ រុស្ស៊ី បន្ត ធ្វើ ការ វាយប្រហារ តាម អាកាស លើ អ៊ុយក្រែន។លោកZelenskyចោទប្រកាន់ថា”ការអំពាវនាវណាមួយឱ្យមានការសន្ទនាពីភាគីរុស្ស៊ីគឺដោយសារតែពួកគេមិនមានមីស៊ីលគ្រាប់រំសេវ ឬទាហានគ្រប់គ្រាន់។ពួកគេត្រូវការពេលវេលាដើម្បីផ្អាកស្ដារកងកម្លាំងរបស់ពួកគេ ហើយបន្ទាប់មកចាប់ផ្តើមការវាយប្រហារឡើងវិញ” ។ទន្ទឹមនឹងនេះ ទីក្រុងមូស្គូបាននិយាយថាខ្លួនបានត្រៀមខ្លួនរួចជាស្រេចសម្រាប់ការចរចាសន្តិភាព ប្រសិនបើក្រុងគៀវពិចារណាលើ “ការពិតថ្មី” ដោយសំដៅលើការទទួលស្គាល់ថារុស្ស៊ីគ្រប់គ្រងប្រហែល១៧.៥% នៃទឹកដីអ៊ុយក្រែន៕
