ប្រទេសថៃរំពឹងថាការនាំចេញនឹងងើបឡើងវិញនៅឆ្នាំក្រោយ

ការនាំចេញរបស់ប្រទេសថៃនឹងងើបឡើងវិញនៅឆ្នាំក្រោយខណៈដែលអតិផរណានឹងស្ថិតនៅក្នុងជួរគោលដៅរបស់ខ្លួនពី១% ទៅ ៣%។ នេះបើយោងតាមការចេញផ្សាយរបស់ធនាគារកណ្តាលថៃ (BoT)។

យោងតាមការចេញផ្សាយរបស់សារព័ត៌មានបាងកកប៉ុស្តិ៍ បានឱ្យដឹងថា របាយការណ៍ដែលទើបប្រកាសថ្មីៗនៃកិច្ចប្រជុំគោលនយោបាយរូបិយវត្ថុកាលពីថ្ងៃទី២៩ ខែវិច្ឆិកា របស់ធនាគារ BoT បានបង្ហាញថា ខណៈដែលការស្ទុះងើបឡើងវិញនៃសេដ្ឋកិច្ចរបស់ប្រទេសថៃនៅតែស្ថិតលើផ្លូវនោះបញ្ហារចនាសម្ព័ន្ធអាចនឹងកម្រិតឥទ្ធិពលវិជ្ជមាននៃសេដ្ឋកិច្ចពិភពលោកទៅលើការនាំចេញនិងគុណភាពឥណទានដែលត្រូវតែមានការត្រួតពិនិត្យ។ធនាគារ BoT បានកត់សម្គាល់ថា លក្ខខណ្ឌហិរញ្ញវត្ថុកាន់តែតឹងរ៉ឹង បានជំរុញឱ្យមានការត្រួតពិនិត្យគុណភាពឥណទានសម្រាប់អាជីវកម្មខ្នាតតូច និងឥណទានគ្រួសារ។

នៅក្នុងកិច្ចប្រជុំនោះ គណៈកម្មាធិការគោលនយោបាយរូបិយវត្ថុ (MPC) បានបោះឆ្នោតជាឯកច្ឆ័ន្ទដើម្បីរក្សាអត្រាការប្រាក់ទិញវិញក្នុងរយៈពេលមួយថ្ងៃរបស់ខ្លួនដែលមិនផ្លាស់ប្តូរនៅកម្រិត ២,៥% ដែលជាកម្រិតខ្ពស់បំផុតក្នុងរយៈពេលមួយទសវត្សរ៍ បន្ទាប់ពីដំឡើងវាដោយ ២០០ចំណុចមូលដ្ឋានចាប់តាំងពីខែសីហាឆ្នាំមុនមក ដើម្បីទប់ស្កាត់អតិផរណា។កំណើនសេដ្ឋកិច្ចរបស់ប្រទេសថៃមានកម្រិតទាបជាងការរំពឹងទុកគឺ១,៥%ក្នុងត្រីមាសចាប់ពីខែកក្កដាដល់ខែកញ្ញាធៀបនឹងឆ្នាំមុន ដែលជាការកើនឡើងយឺតបំផុតនៅក្នុងឆ្នាំនេះ ទៅលើការនាំចេញទន់ខ្សោយ និងការចំណាយរបស់រដ្ឋាភិបាល។ ធនាគារ BoT នឹងពិនិត្យមើលឡើងវិញនូវអត្រាគោលនយោបាយបន្ទាប់ នៅថ្ងៃទី៧ ខែកុម្ភៈ ឆ្នាំ២០២៤។វាបានព្យាករណ៍ពីអតិផរណាដល់កម្រិតមធ្យមចំនួន ១,៣% នៅក្នុងឆ្នាំនេះ ដែលធ្លាក់ចុះពីចំនួន ១,៦% ដែលបានព្យាករណ៍ពីមុន។

ធនាគារ BoT បានព្យាករណ៍ថា អតិផរណានៅក្នុងឆ្នាំ២០២៤ នឹងឈរនៅកម្រិត ២,០% ប៉ុន្តែកម្រិតនេះនឹងមិនមែនជាកត្តានៃផលប៉ះពាល់សក្តានុពលនៃកម្មវិធីជំរុញកាបូបប្រាក់ឌីជីថល ៥០០ប៊ីលានបាត (១៣,៩ប៊ីលានដុល្លារអាមេរិក) របស់រដ្ឋាភិបាលថៃនោះទេ។ដោយឡែកពីគ្នា មន្ត្រីនៃធនាគារ BoT បានព្យាករណ៍ថាការទៅដល់របស់ភ្ញៀវទេសចរនឹងត្រលប់ទៅកម្រិតមុនពេលមានជំងឺរាតត្បាតវិញនៅចុងឆ្នាំ២០២៥ដែលជំរុញដោយភ្ញៀវទេសចរដែលមិនមែនជាជនជាតិចិន។ធនាគារកណ្តាលបានកែប្រែការព្យាកររបស់ខ្លួនអំពីការទៅដល់របស់ភ្ញៀវទេសចរចិននៅក្នុងឆ្នាំ២០២៤ ពីចំនួន ៧,៥លាននាក់ មកនៅត្រឹម ៦,២លាននាក់។ នៅក្នុងឆ្នាំ២០២៥ ធនាគារកណ្តាលរំពឹងថានឹងមានអ្នកធ្វើដំណើរពីប្រទេសចិនចំនួន ៧,៨លាននាក់ ដែលនៅតែទាបជាងចំនួនប្រមាណជិត ១១លាននាក់ដែលបានកត់ត្រានៅក្នុងឆ្នាំ២០១៩ នៅពេលដែលប្រទេសនេះបានស្វាគមន៍ការទៅដល់របស់ភ្ញៀវទេសចរបរទេសសរុបចំនួន ៤០លាននាក់៕ប្រភពVNA