សហរដ្ឋអាមេរិកជប៉ុនកូរ៉េខាងត្បូងនិងអូស្ត្រាលី បានដាក់ទណ្ឌកម្មថ្មីប្រឆាំងនឹងកូរ៉េខាងជើង

សហរដ្ឋអាមេរិកនិងប្រទេសសម្ព័ន្ធមិត្តចំនួន៣ រួមមាន ជប៉ុន កូរ៉េខាងត្បូង និងអូស្ត្រាលីទើបតែដាក់ទណ្ឌកម្មថ្មីប្រឆាំងនឹងកូរ៉េខាងជើងចំពោះការបាញ់បង្ហោះផ្កាយរណបចារកម្ម។ការផ្លាស់ប្តូរនេះបានធ្វើឡើងបន្ទាប់ពីទីក្រុងព្យុងយ៉ាងបានប្រកាសថាផ្កាយរណបឈ្លបយកការណ៍ដែលខ្លួនបានបាញ់បង្ហោះដោយជោគជ័យទៅកាន់គន្លងតារាវិថីកាលពីសប្តាហ៍មុនបានថតរូបទីតាំងយោធាអាមេរិកនៅក្នុងប្រទេសជប៉ុន កោះហ្គាំ និងសេតវិមាន។យោងតាមទីភ្នាក់ងារសារព័ត៌មានAnadolu នេះជាលើកដំបូងដែលប្រទេសសម្ព័ន្ធមិត្តចំនួនបួនបានដាក់ទណ្ឌកម្មលើកូរ៉េខាងជើងក្នុងពេលតែមួយ។សេចក្តីថ្លែងការណ៍របស់ក្រសួងរតនាគារសហរដ្ឋអាមេរិកកាលពីថ្ងៃទី៣០ខែវិច្ឆិកាបាននិយាយថា”នៅក្នុងការសម្របសម្រួលជាមួយដៃគូបរទេសការិយាល័យគ្រប់គ្រងទ្រព្យសម្បត្តិបរទេសរបស់សហរដ្ឋអាមេរិកបានដាក់ទណ្ឌកម្មភ្នាក់ងារកូរ៉េខាងជើងចំនួន៨នៅបរទេស” ។ ទីក្រុងវ៉ាស៊ីនតោនបានចោទប្រកាន់ពួកគេពី”ការសម្របសម្រួលការគេចវេសពីទណ្ឌកម្មរួមទាំងតាមរយៈការបង្កើតប្រាក់ចំណូលនិងការទិញបច្ចេកវិទ្យាទាក់ទងនឹងមីស៊ីលដើម្បីគាំទ្រកម្មវិធីអាវុធប្រល័យលោករបស់កូរ៉េខាងជើង”។

អាជ្ញាធរអាមេរិកក៏បានដាក់ទណ្ឌកម្មលើក្រុមចារកម្មអ៊ីនធឺណេតKimsuky សម្រាប់”ការប្រមូលព័ត៌មានចារកម្មដើម្បីគាំទ្រដល់គោលដៅយុទ្ធសាស្ត្ររបស់ទីក្រុងព្យុងយ៉ាង”។ទីភ្នាក់ងារសារព័ត៌មានYonhapក៏បានដកស្រង់សម្តីតំណាងរដ្ឋាភិបាលកូរ៉េខាងត្បូងនៅថ្ងៃនេះ(ថ្ងៃទី១ខែធ្នូ) ដោយបានប្រកាសថា ទីក្រុងសេអ៊ូលបានអនុវត្តជាឯកតោភាគីដាក់ទណ្ឌកម្មប្រឆាំងនឹងជនជាតិកូរ៉េខាងជើងយ៉ាងតិច១១នាក់ “ពាក់ព័ន្ធនឹងិវឌ្ឍន៍ការពារជាតិ” ។

លោក Brian E. Nelson មន្ត្រីនៅក្រសួងរតនាគារសហរដ្ឋអាមេរិក បានសង្កត់ធ្ងន់ថា សកម្មភាពរបស់សហរដ្ឋអាមេរិក និងសម្ព័ន្ធមិត្តទាំង៣“ឆ្លុះបញ្ចាំងពីការប្តេជ្ញាចិត្តរួមក្នុងការប្រយុទ្ធប្រឆាំងនឹងសកម្មភាពខុសច្បាប់និងអស្ថិរភាពរបស់ទីក្រុងព្យុងយ៉ាង”។
មន្ត្រី កូរ៉េ ខាង ជើង មិន បាន ធ្វើ អត្ថាធិប្បាយ ជុំវិញ ព័ត៌មាន ខាង លើ នេះ ទេ។

កូរ៉េខាងជើងកំពុងប្រឈមមុខនឹងដំណោះស្រាយទណ្ឌកម្មសំខាន់ៗចំនួន៩ដែលចេញដោយក្រុមប្រឹក្សាសន្តិសុខអង្គការសហប្រជាជាតិដើម្បីឆ្លើយតបទៅនឹងសកម្មភាពនុយក្លេអ៊ែរនិងមីស៊ីលចាប់តាំងពីឆ្នាំ២០០៦។លើសពីនេះទីក្រុងវ៉ាស៊ីនតោនធ្លាប់បានដាក់ទណ្ឌកម្មផ្ទាល់ខ្លួនប្រឆាំងនឹងទីក្រុងព្យុងយ៉ាង៕