ប្រព័ន្ធផ្សព្វផ្សាយអ៊ីស្រាអែលបានរាយការណ៍ថាមហាសេដ្ឋីអាមេរិក លោក Elon Musk គ្រោងនឹងទៅលេងទីក្រុងនានានៅជិតព្រំដែនជាមួយតំបន់ ហ្គាហ្សាស្ទ្រីបនៅសប្តាហ៍ក្រោយ។គេហទំព័រព័ត៌មានអ៊ីស្រាអែល N12 នៅថ្ងៃទី២៣ខែវិច្ឆិកាបានដកស្រង់ប្រភពមួយដែលនិយាយថាElon Musk គ្រោងនឹងទៅលេងទីក្រុងអ៊ីស្រាអែលប្រហែល៧គីឡូម៉ែត្រពីព្រំដែនហ្គាហ្សាស្ទ្រីប។ទីប្រជុំជនទាំងនេះត្រូវបានរងផលប៉ះពាល់យ៉ាងខ្លាំងនៅក្នុងការវាយប្រហារដោយក្រុមហាម៉ាស់កាលពីថ្ងៃទី៧ខែតុលាដែលបានបណ្តាលឱ្យមនុស្ស១,៤០០នាក់បានស្លាប់និងប្រហែល២៤០នាក់ត្រូវបានចាប់ធ្វើជាចំណាប់ខ្មាំង។
យោងតាមN12លោកMuskនឹងពិចារណាពីផលវិបាកនៃការវាយប្រហារដែលបង្កឡើងដោយក្រុមហាម៉ាស់នៅក្នុងតំបន់ទាំងនេះ។ លោកក៏គ្រោងនឹងជួបជាមួយប្រធានាធិបតីអ៊ីស្រាអែលIsaac Herzog និងនាយករដ្ឋមន្ត្រី Benjamin Netanyahu ផងដែរ។Tel Aviv មិនបានបញ្ជាក់ពីដំណើរទស្សនកិច្ចរបស់មហាសេដ្ឋីអាមេរិកនោះទេ។បើវាកើតឡើង នេះនឹងជាជំនួបលើកទី២ក្នុងឆ្នាំរវាងមហាសេដ្ឋី Musk និងនាយករដ្ឋមន្ត្រី Netanyahu។កិច្ចប្រជុំលើកដំបូងបានធ្វើឡើងនៅរដ្ឋកាលីហ្វ័រញ៉ាក្នុងខែកញ្ញាក្នុងអំឡុងពេលដែលអ្នកទាំង២បានពិភាក្សាអំពីរលកនៃការប្រឆាំងពួកយូដានៅលើបណ្តាញសង្គម X ដែលជាកម្មសិទ្ធិរបស់ Musk ។
ព័ត៌មានអំពីដំណើរទស្សនកិច្ចរបស់លោក Musk បានបង្ហាញនៅក្នុងបរិបទនៃសេចក្តីប្រកាសរបស់មហាសេដ្ឋីអាមេរិក ដើម្បីបរិច្ចាគរាល់ប្រាក់ចំណូលពីការផ្សាយពាណិជ្ជកម្មនិងការជាវដែលទាក់ទងនឹងសង្រ្គាមហ្គាហ្សាដល់មន្ទីរពេទ្យក្នុងប្រទេសអ៊ីស្រាអែល។
លោក Musk កំពុងប្រឈមមុខនឹងការចោទប្រកាន់ប្រឆាំងនឹងពួកយូដា។ Muskធ្លាប់បានសម្តែងការគាំទ្រចំពោះទ្រឹស្តីឃុបឃិតដែលជនជាតិជ្វីហ្វកំពុងញុះញង់ឱ្យមានការស្អប់ប្រឆាំងនឹងជនជាតិស្បែកសដែលបណ្តាលឱ្យសេតវិមានរិះគន់លោក។នៅចុងខែតុលាលោកបានធ្វើឱ្យអ៊ីស្រាអែលខឹងនៅពេលដែលលោកបានប្រកាសពីការត្រៀមខ្លួនរបស់លោកក្នុងការផ្តល់អ៊ីនធឺណិតដោយប្រើឧបករណ៍ Starlink ដល់អង្គការមនុស្សធម៌នៅហ្គាហ្សា។ ទីក្រុង Tel Aviv ជឿជាក់ថាកងកម្លាំងហាម៉ាស់អាចទាញយកប្រយោជន៍ពីរឿងនេះ សម្រាប់សកម្មភាពរបស់ពួកគេ៕ប្រភព Business Insider
