កូរ៉េខាងជើងបានប្រកាសថាខ្លួនបានបាញ់បង្ហោះផ្កាយរណបចារកម្មដំបូងរបស់ខ្លួនដោយជោគជ័យទៅកាន់គន្លងតារាវិថីដោយសង្កត់ធ្ងន់ថាខ្លួននឹងធ្វើការបាញ់បង្ហោះបន្ថែមទៀតនាពេលខាងមុខ។យោងតាម Yonhap កាលពីថ្ងៃទី ២១ខែវិច្ឆិកាទីភ្នាក់ងារព័ត៌មានកណ្តាលរបស់កូរ៉េខាងជើង KCNA បានប្រកាសថាទីក្រុងព្យុងយ៉ាងបានបាញ់បង្ហោះផ្កាយរណបចារកម្មដោយជោគជ័យទៅកាន់គន្លងតារាវិថីជាលើកដំបូងបន្ទាប់ពីការសាកល្បងបរាជ័យចំនួន២ដងក្នុងខែសីហានិងឧសភាថ្មីៗនេះ។”ការបាញ់បង្ហោះផ្កាយរណបបានប្រើប្រាស់Chollima-1 booster rocket ។
រ៉ុក្កែតនេះបានបំបែកដោយជោគជ័យ ហើយដាក់ផ្កាយរណប Malligyong-1 ចូលទៅក្នុងគន្លងនៅម៉ោង១០:៥៤ យប់៧០៥វិនាទីបន្ទាប់ពីការបាញ់បង្ហោះ។ មេដឹកនាំ Kim Jong Un បានមកមើលនិងអបអរសាទរដល់មន្ត្រីអ្នកវិទ្យាសាស្ត្រ។ទីភ្នាក់ងារសារព័ត៌មានកូរ៉េខាងជើងបាននិយាយថាការបាញ់បង្ហោះផ្កាយរណបឈ្លបយកការណ៍គឺជាសិទ្ធិស្របច្បាប់របស់ទីក្រុងព្យុងយ៉ាងក្នុងការការពារខ្លួន ហើយប្រទេសនេះនឹងធ្វើការបាញ់បង្ហោះបន្ថែមទៀតនាពេលអនាគតដ៏ខ្លីខាងមុខនេះ។បច្ចុប្បន្ននេះ
សហរដ្ឋអាមេរិកនិងកូរ៉េខាងត្បូងនៅតែកំពុងវិភាគព័ត៌មានរបស់ទីក្រុងព្យុងយ៉ាងហើយមិនទាន់បានបញ្ជាក់ថាតើការបាញ់បង្ហោះជោគជ័យឬអត់នោះទេ។ទោះបីជាយ៉ាងណាក៏ដោយមន្ត្រីកូរ៉េខាងត្បូងម្នាក់បានប្រាប់Yonhapថាកូរ៉េខាងជើងអាចត្រូវបានគេចាត់ទុកថាទទួលបានជោគជ័យ។”ប្រសិនបើផ្កាយរណបរបស់ពួកគេហោះហើរពីរបីដងជុំវិញគន្លងផែនដី”។អគ្គសេនាធិការចម្រុះរបស់កូរ៉េខាងត្បូង (JCS) បាននិយាយថា ការបាញ់បង្ហោះផ្កាយរណបចារកម្មរបស់ប្រទេសកូរ៉េខាងជើងបានរំលោភលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ សហរដ្ឋអាមេរិកនិងជប៉ុនក៏បានថ្កោលទោសការបាញ់បង្ហោះផ្កាយរណបរបស់កូរ៉េខាងជើងដោយបញ្ជាក់ថាសកម្មភាពរបស់ទីក្រុងព្យុងយ៉ាង “បង្កើនភាពតានតឹងនិងធ្វើឱ្យសន្តិសុខក្នុងតំបន់មានអស្ថិរភាព”៕
