ឧបនាយករដ្ឋមន្ត្រីរុស្ស៊ី Andrey Belousov បាននិយាយថា៩៥% នៃពាណិជ្ជកម្មរវាងប្រទេសទាំង២បច្ចុប្បន្នគិតជាប្រាក់រូប្លិ៍និងប្រាក់យន់។
កាលពីថ្ងៃទី២០ខែវិច្ឆិកានៅក្នុងកិច្ចប្រជុំនៃគណៈកម្មាធិការអន្តររដ្ឋាភិបាលរុស្ស៊ី-ចិននៅទីក្រុងប៉េកាំងលោក Belousov បានប្រកាសថា រូបិយប័ណ្ណនៃប្រទេសលោកខាងលិចកំពុងបាត់បន្តិចម្តងៗនៅក្នុងសកម្មភាពពាណិជ្ជកម្មរុស្ស៊ី-ចិន។
ចាប់តាំងពីលោកខាងលិចដាក់ទណ្ឌកម្មលើរុស្ស៊ីក្រោយសង្គ្រាមនៅអ៊ុយក្រែនប្រទេសទាំង២នេះបានពន្លឿនការប្រើប្រាស់រូបិយប័ណ្ណក្នុងស្រុកក្នុងពាណិជ្ជកម្ម។យោងតាមលោកBelousovប្រហែល៩៥%នៃប្រតិបត្តិការរវាងភាគីទាំង២កំពុងត្រូវបានអនុវត្តជារូប្លិ៍និងប្រាក់យន់។ជាមួយនឹងកម្រិតនៃកិច្ចសហប្រតិបត្តិការសេដ្ឋកិច្ចនាពេលបច្ចុប្បន្នសមាមាត្រនេះអាចបន្តកើនឡើង។នៅក្នុងកិច្ចប្រជុំនោះឧបនាយករដ្ឋមន្ត្រីរុស្ស៊ីក៏បាននិយាយផងដែរថា ចំណូលពាណិជ្ជកម្មទ្វេភាគីនឹងលើសពី២០០ពាន់លានដុល្លារនៅឆ្នាំនេះ ហើយអាចឈានដល់៣០០ពាន់លានដុល្លារនៅឆ្នាំ២០៣០។ កាលពីឆ្នាំមុន ពាណិជ្ជកម្មរវាងទីក្រុងម៉ូស្គូនិងទីក្រុងប៉េកាំងបានឈានដល់កំណត់ត្រា១៩០ ពាន់លានដុល្លារអាមេរិកកើនឡើង២៩% បើប្រៀបធៀបទៅនឹងឆ្នាំ២០២១ ដោយសារការដាក់ទណ្ឌកម្មរបស់លោកខាងលិចបានបង្ខំឱ្យរុស្ស៊ីផ្លាស់ប្តូរពាណិជ្ជកម្មទៅខាងកើត។Belousovបាននិយាយថាប្រទេសចិនគឺជាដៃគូពាណិជ្ជកម្មដ៏សំខាន់របស់រុស្ស៊ីជាយូរមកហើយ។ ទស្សនវិស័យវិនិយោគរវាងប្រទេសទាំង២កំពុងបន្តពង្រីក។ លោកបានបន្តថា៖ «គម្រោងសហប្រតិបត្តិការវិនិយោគថ្មីកំពុងត្រូវបានអនុវត្តក្នុងវិស័យអាទិភាពជាច្រើនដូចជារថយន្ត ការជីកយករ៉ែ ឧស្ម័ន កសិកម្ម ភស្តុភារ និងបច្ចេកវិទ្យាព័ត៌មាន»។ក្រុមហ៊ុនចិនទទួលបានអត្ថប្រយោជន៍យ៉ាងច្រើនបន្ទាប់ពីអាជីវកម្មលោកខាងលិចដកខ្លួនចេញពីរុស្ស៊ីដោយសារតែសង្គ្រាមនៅអ៊ុយក្រែន។ពួកគេបានបំពេញចន្លោះដែលបានបន្សល់ទុកយ៉ាងឆាប់រហ័ស ហើយបានបង្កើនវត្តមានរបស់ពួកគេនៅក្នុងប្រទេសរុស្ស៊ីយ៉ាងខ្លាំងក្លា។
លោកBelousovបានសង្កត់ធ្ងន់ថា”ការពិតដែលថាអាជីវកម្មលោកខាងលិចចាកចេញពីប្រទេសរុស្ស៊ីបានបង្កើតឱកាសដ៏អស្ចារ្យសម្រាប់ដៃគូចិនក្នុងការជ្រៀតចូលវិស័យរុស្ស៊ីជាច្រើនដូចជា ប្រេង និងឧស្ម័ន គីមីឥន្ធនៈ ការផលិតគ្រឿងបន្លាស់រថយន្តក៏ដូចជាទំនិញប្រើប្រាស់ កញ្ចក់ សម្ភារៈសំណង់”។រុស្ស៊ីនៅតែជាប្រទេសផ្គត់ផ្គង់ផលិតផលថាមពលដ៏សំខាន់ដល់ប្រទេសចិន ដូចជាប្រេង និងឧស្ម័ន ឬផលិតផលកសិកម្ម។ ប្រទេសចិននាំចេញទំនិញស្ទើរតែទាំងអស់នៅទីនេះ ចាប់ពីអាហារ គ្រឿងម៉ាស៊ីន ទូរសព្ទដៃ របស់ក្មេងលេង និងសម្លៀកបំពាក់៕ប្រភពRT
