តម្លៃប្រេងឆៅបានធ្លាក់ចុះជិត២០%ចាប់តាំងពីខែកញ្ញាដែលបណ្តាលឱ្យប្រទេសផលិតប្រេងសំខាន់ៗពិចារណាលើការរឹតបន្តឹងការផ្គត់ផ្គង់បន្ថែមទៀតនៅក្នុងកិច្ចប្រជុំសប្តាហ៍នេះ។នៅចុងខែកញ្ញា តម្លៃប្រេង Brent ជិតដល់៩៨ដុល្លារក្នុងមួយបារ៉ែល។ យ៉ាងណាមិញតម្លៃបច្ចុប្បន្នគឺប្រហែលតែ៧៩ដុល្លារប៉ុណ្ណោះ។ការព្រួយបារម្ភអំពីតម្រូវការនិងលទ្ធភាពនៃការធ្លាក់ចុះនៃការផ្គត់ផ្គង់នៅឆ្នាំក្រោយបានធ្វើឱ្យមានទម្ងន់លើតម្លៃប្រេង ទោះបីជាមានជម្លោះនៅមជ្ឈិមបូព៌ានិងការកាត់បន្ថយផលិតកម្មពីអង្គការនៃប្រទេសនាំចេញប្រេងនិងសម្ព័ន្ធមិត្ត (OPEC+) ក៏ដោយ។
បន្ទាប់ពីការកាត់បន្ថយជាបន្តបន្ទាប់ពីចុងឆ្នាំ២០២២ អារ៉ាប៊ីសាអូឌីត រុស្ស៊ី និងសមាជិកដទៃទៀតនៃអង្គការOPEC+ បានប្តេជ្ញាដកខ្លួនចេញពីទីផ្សារប្រេង៥.១៦លានបារ៉ែលក្នុងមួយថ្ងៃស្មើនឹង ៥% នៃតម្រូវការប្រេងពិភពលោក។ ចំនួននេះរួមមាន៣.៦៦ លានបារ៉ែលពីបណ្តាប្រទេសOPEC+ និងការកាត់បន្ថយដោយស្ម័គ្រចិត្តពីអារ៉ាប៊ីសាអូឌីតនិងរុស្ស៊ី។
Reutersបានដកស្រង់ប្រភពពីអង្គការOPEC+ ដោយនិយាយថា ការកាត់បន្ថយនាពេលបច្ចុប្បន្នប្រហែលជាមិនគ្រប់គ្រាន់ទេ ហើយក្រុមនេះនឹងវិភាគលទ្ធភាពនៃការកាត់បន្ថយបន្ថែមទៀត។ ប្រភព២ផ្សេងទៀតរបស់ Reuters ក៏បានបញ្ជាក់រឿងនេះផងដែរ។ប្រភព Reuters បាននិយាយថា “OPEC+ មិនរីករាយក្នុងការឃើញការប្រែប្រួលទីផ្សារដែលកំពុងកើនឡើងនៅមុនកិច្ចប្រជុំបន្ទាប់បើទោះបីជាមូលដ្ឋានគ្រឹះនៅតែរឹងមាំ។រដ្ឋមន្ត្រីទំនងជានឹងពិភាក្សាអំពីគោលនយោបាយបន្ថែមដែលគួរមានដើម្បីរក្សាស្ថិរភាពនិន្នាការ” ។
OPEC+ នឹងមានកិច្ចប្រជុំនៅថ្ងៃទី២៦ខែវិច្ឆិកា។ ផែនការកាត់បន្ថយផលិតកម្មបច្ចុប្បន្នរបស់ក្រុមនេះមានរយៈពេលរហូតដល់ឆ្នាំ២០២៤។សមាជិក OPEC+ ជាច្រើនឥឡូវនេះចាត់ទុកប្រេងជាប្រភពចំណូលសំខាន់របស់រដ្ឋាភិបាល។ ទោះជាយ៉ាងណាក៏ដោយអ្នកវិភាគនិយាយថាប្រសិនបើផលិតកម្មប្រេងនៅតែបន្តធ្លាក់ចុះនោះសេដ្ឋកិច្ចរបស់ប្រទេសអារ៉ាប៊ីសាអូឌីតទំនងជានឹងជួបប្រទះនឹងកំណើនអវិជ្ជមាននៅឆ្នាំនេះ។តម្លៃប្រេងឆៅបានបន្តធ្លាក់ចុះកាលពីសប្តាហ៍មុន បើទោះបីជារបាយការណ៍ប្រចាំខែរបស់ OPEC និយាយថា មូលដ្ឋានគ្រឹះនៃទីផ្សារប្រេងនៅតែរឹងមាំក៏ដោយ។ ដូច្នេះអង្គការរក្សាការព្យាករណ៍តម្រូវការរបស់ខ្លួនសម្រាប់ឆ្នាំ២០២៤នៅកម្រិតខ្ពស់។ផ្ទុយទៅវិញ ទីភ្នាក់ងារថាមពលអន្តរជាតិ (IEA) កាលពីសប្តាហ៍មុនបានបន្ទាបការព្យាករណ៍តម្រូវការប្រេងរបស់ខ្លួនសម្រាប់ឆ្នាំក្រោយ។ពួកគេក៏បានព្រមានផងដែរថាទីផ្សារទំនងជាត្រូវបានផ្គត់ផ្គង់លើសនៅក្នុងត្រីមាសទី១នៃឆ្នាំ២០២៤៕ប្រភព Reuters
