កងកម្លាំងពិសេសអ៊ីរ៉ង់បានប្តេជ្ញាថានឹងធ្វើអ្វីគ្រប់យ៉ាងចាំបាច់ដើម្បីគាំទ្រក្រុមហាម៉ាស់
ឧត្តមសេនីយ៍ឯក Esmail Qaani មេបញ្ជាការនៃក្រុមQuds នៃកងឆ្មាំបដិវត្តន៍អ៊ីស្លាមអ៊ីរ៉ង់។ រូបថត៖ Tasnim
មេបញ្ជាការនៃក្រុមការងារQudsរបស់អ៊ីរ៉ង់បានបញ្ជាក់ថាកងកម្លាំងរបស់ប្រទេសបានត្រៀមខ្លួនរួចរាល់ហើយដើម្បី”ធ្វើអ្វីគ្រប់យ៉ាងដែលចាំបាច់” ដើម្បីគាំទ្រក្រុមហាម៉ាស់ក្នុងជម្លោះរបស់ខ្លួនជាមួយអ៊ីស្រាអែល។
ឧត្តមសេនីយ៍ទោ Esmail Qaani មេបញ្ជាការនៃក្រុមQuds នៃកងឆ្មាំបដិវត្តអ៊ីស្លាមអ៊ីរ៉ង់បាននិយាយថា “យើងធ្វើការប្តេជ្ញាចិត្តជាបងប្អូន និងធានាដល់អ្នកថាយើងនឹងធ្វើអ្វីដែលចាំបាច់នៅក្នុងសមរភូមិប្រវត្តិសាស្ត្រនេះ” ។លិខិតចុះថ្ងៃទី១៦ ខែវិច្ឆិកា។ឧត្តមសេនីយ៍Qaani បាននិយាយថា “បងប្អូនត្រូវតែតស៊ូនឹងរួបរួមគ្នានិងមិនអនុញ្ញាតឱ្យសត្រូវសម្រេចបាននូវគោលដៅកខ្វក់របស់ពួកគេនៅក្នុងតំបន់ហ្គាហ្សាស្រ្ទីបនិងប៉ាឡេស្ទីន” ដោយសំដៅទៅលើបណ្តាញក្រុមប្រដាប់អាវុធដែលគាំទ្រដោយអ៊ីរ៉ង់ បន្ថែមលើក្រុមហាម៉ាសដូចជាក្រុមជីហាតអ៊ីស្លាមប៉ាឡេស្ទីន (PIJ) និងក្រុមហេសបូឡានៅលីបង់។ឧត្តមសេនីយ៍Qaani បានអត្ថាធិប្បាយថា សកម្មភាពយោធារបស់ក្រុមទាំងនេះ”បង្ហាញយ៉ាងច្បាស់ពីភាពទន់ខ្សោយ និងភាពផុយស្រួយរបស់អង្គភាពជ្វីហ្វ”ហើយបានសរសើរ “ប្រតិបត្តិការទឹកជំនន់នៅAl-Aqsa” ដែលជាពាក្យដែលក្រុមហាម៉ាស់ប្រើសំដៅលើការវាយប្រហារទ្រង់ទ្រាយធំលើអ៊ីស្រាអែលនៅលើ ថ្ងៃទី៧ខែតុលា។
លោកបានបញ្ជាក់ថា ស្ថានការណ៍នៅមជ្ឈិមបូព៌ានឹងមិនវិលទៅរកសភាពការណ៍ដូចមុនការវាយប្រហាររបស់ក្រុមហាម៉ាស់ឡើយ។ ឧត្តមសេនីយ៍ Qaani បានប្រកាសថា”ការតស៊ូនឹងមិនអនុញ្ញាតឱ្យសត្រូវ និងអ្នកដែលនៅពីក្រោយវាគ្រប់គ្រងតំបន់ហ្គាហ្សាស្រ្ទីបនិងប្រជាជនរបស់ខ្លួនឡើយ”។លិខិតរបស់មេបញ្ជាការនៃក្រុមការងារQudsត្រូវបានបោះពុម្ពផ្សាយមួយថ្ងៃបន្ទាប់ពីReutersបានដកស្រង់សម្តីមន្ត្រីជាន់ខ្ពស់របស់ហាម៉ាស់ថា “អ៊ីរ៉ង់ប្រហែលជាមិនចូលរួមក្នុងយុទ្ធនាការប្រឆាំងនឹងអ៊ីស្រាអែលទេ” ដោយសារតែទីក្រុងតេអេរ៉ង់មិនត្រូវបានជូនដំណឹងអំពីការវាយប្រហារនៅថ្ងៃទី៧ខែកញ្ញា។យោងតាមមន្ត្រីក្រុមហាម៉ាស់មេដឹកនាំកំពូលរបស់អ៊ីរ៉ង់ក៏បានរារាំងសមាជិកនៃក្រុមពីការអំពាវនាវឱ្យប្រទេសនិងក្រុមហេសបូឡា លីបង់ ចេញទៅប្រយុទ្ធទាំងអស់គ្នា។ក្រោយការវាយប្រហាររបស់ក្រុមហាម៉ាស់ការប៉ះទង្គិចឆ្លងព្រំដែនរវាងក្រុមហេសបូឡានិងកងទ័ពអ៊ីស្រាអែលបានកើតឡើងស្ទើររាល់ថ្ងៃ។កងកម្លាំងអាមេរិកដែលកំពុងប្រតិបត្តិការនៅក្នុងប្រទេសស៊ីរី និងអ៊ីរ៉ាក់ក៏ត្រូវបានវាយប្រហារម្តងហើយម្តងទៀតដោយកងជីវពលគាំទ្រអ៊ីរ៉ង់ជាមួយនឹងគ្រាប់រ៉ុក្កែតនិងយន្តហោះគ្មានមនុស្សបើក។ទោះបីជាយ៉ាងណាក៏ដោយ ក្រុមហេសបូឡា ហាក់បីដូចជាទប់កម្រិតនៃការប្រយុទ្ធគ្នា និងមិនបានបញ្ចេញកម្លាំងពេញលេញរបស់ខ្លួនឡើយ។ កងកម្លាំងការពារអ៊ីស្រាអែល(IDF)ក៏បានឆ្លើយតបជាមួយនឹងការវាយប្រហារតាមអាកាសទៅលើទីតាំងមួយចំនួនរបស់ក្រុមហេសបូឡានៅក្នុងប្រទេសលីបង់ដោយមិនបានបើកយុទ្ធនាការទ្រង់ទ្រាយធំដូចនៅតំបន់ហ្គាហ្សាស្ទ្រីបនោះទេ។ភាគីជាច្រើនបានជជែកវែកញែកអំពីវិសាលភាពនៃការចូលរួមរបស់អ៊ីរ៉ង់ក្នុងការវាយប្រហារលើអ៊ីស្រាអែលដែលធ្វើឡើងដោយក្រុមហាម៉ាស់។ អ្នកតំណាងក្រុមហាម៉ាស់បានប្រកាសថាក្រុមនេះបានទទួល “ការគាំទ្រដោយផ្ទាល់”ពីអ៊ីរ៉ង់ក្នុងអំឡុងពេលវាយប្រហារ។ ទោះបីជាយ៉ាងណាក៏ដោយក្រោយមកអ៊ីរ៉ង់បានបដិសេធព័ត៌មាននេះ ហើយបានអះអាងថាខ្លួនមិនមានជាប់ពាក់ព័ន្ធក្នុងការវាយប្រហារនេះទេ ទោះបីជាខ្លួនបានសម្តែងការគាំទ្រចំពោះយុទ្ធនាការរបស់ក្រុមហាម៉ាស់ក៏ដោយ៕ប្រភពToI
