ណាតូបានរិះគន់ការដកខ្លួនរបស់រុស្ស៊ីចេញពីសន្ធិសញ្ញាស្តីពីកងកម្លាំងប្រដាប់អាវុធសាមញ្ញនៅអឺរ៉ុបដោយប្រកាសថាសម្ព័ន្ធភាពនឹងផ្អាកកិច្ចព្រមព្រៀងនេះផងដែរ។អង្គការណាតូបាននិយាយថា”សម្ព័ន្ធមិត្តរិះគន់ការដកខ្លួនរបស់រុស្ស៊ីចេញពីសន្ធិសញ្ញាស្តីពីកងកម្លាំងប្រដាប់អាវុធសាមញ្ញនៅអឺរ៉ុប(CFE) និងយុទ្ធនាការរបស់ខ្លួនក្នុងប្រទេសអ៊ុយក្រែនដែលផ្ទុយទៅនឹងគោលដៅនៃសន្ធិសញ្ញានេះ” ណាតូបាននិយាយនៅថ្ងៃនេះ។ “ការដកខ្លួនរបស់រុស្ស៊ីពី CFE គឺជាសកម្មភាពចុងក្រោយបង្អស់នៅក្នុងសកម្មភាពជាបន្តបន្ទាប់ ដែលកំពុងបំផ្លាញសន្តិសុខជាប្រព័ន្ធនៃតំបន់ Euro-Atlantic”។
យោងតាមអង្គការណាតូ ប្រទេសសមាជិកសម្ព័ន្ធភាពបានសម្រេចចិត្តផ្អាក CFEសម្រាប់ពេលវេលាចាំបាច់ស្របតាមសិទ្ធិរបស់ពួកគេក្រោមច្បាប់អន្តរជាតិ។សម្ព័ន្ធយោធាបានបន្ថែមថា”នេះគឺជាការសម្រេចចិត្តដែលគាំទ្រដោយសមាជិកណាតូទាំងអស់” ។សហរដ្ឋអាមេរិកបានប្រកាសថាខ្លួននឹងផ្អាក CFE ចាប់ពីថ្ងៃទី៧ ខែវិច្ឆិកា។ ទីប្រឹក្សាសន្តិសុខសេតវិមាន លោក Jake Sullivan បាននិយាយថា រុស្ស៊ីបានដកខ្លួនចេញពី CFE ហើយជម្លោះរុស្ស៊ី-អ៊ុយក្រែនបានផ្លាស់ប្តូរបរិបទទាក់ទងនឹងសន្ធិសញ្ញា និងកាតព្វកិច្ចរបស់ភាគីពាក់ព័ន្ធ។ សហរដ្ឋអាមេរិកនិងសម្ព័ន្ធមិត្តរបស់ខ្លួននៅតែប្តេជ្ញាចិត្តក្នុងការគ្រប់គ្រងសព្វាវុធសាមញ្ញប្រកបដោយប្រសិទ្ធភាព។ណាតូបានធ្វើអត្ថាធិប្បាយក្នុងបរិបទនៃការប្រកាសរបស់រុស្ស៊ីថា ខ្លួនបានបញ្ចប់នីតិវិធីដែលបានកំណត់ ហើយបានដកខ្លួនជាផ្លូវការពី CFE ចាប់ពីម៉ោង០:០០ ថ្ងៃទី៧ខែវិច្ឆិកា។ ទីក្រុងម៉ូស្គូបានចោទប្រកាន់ទីក្រុងវ៉ាស៊ីនតោនពីការបំផ្លាញសន្តិសុខក្រោយសង្គ្រាមត្រជាក់ដោយជំរុញឱ្យអង្គការណាតូពង្រីក។
CFE ត្រូវបានចុះហត្ថលេខាក្នុងឆ្នាំ១៩៩០រវាងអង្គការណាតូ និងបណ្តាប្រទេស Warsaw Pact ដើម្បីបង្កើតសមតុល្យយោធា កំណត់ចំនួនរថក្រោះ និងរថពាសដែក កាំភ្លើងធំ ឧទ្ធម្ភាគចក្រ និងយន្តហោះចម្បាំងដែលឈរជើងនៅអឺរ៉ុបជៀសវាងភាគីប្រមូលផ្តុំកងកម្លាំងទ្រង់ទ្រាយធំសម្រាប់ការវាយប្រហាររហ័ស។រុស្ស៊ីបានផ្អាក CFE តាំងពីឆ្នាំ២០០៧ដោយចោទប្រកាន់សមាជិកណាតូថាបានបំពានសន្ធិសញ្ញាម្តងហើយម្តងទៀតហើយមិនបានផ្តល់សច្ចាប័នលើកំណែ១៩៩៩ដែលបានធ្វើបច្ចុប្បន្នភាព។
ការសម្រេចចិត្តដកប្រទេសរុស្ស៊ីចេញពី CFE ត្រូវបានធ្វើឡើងដោយប្រធានាធិបតីVladimir Putinនៅក្នុងខែឧសភា ហើយត្រូវបានអនុម័តយ៉ាងឆាប់រហ័សដោយសភារបស់ប្រទេស។ អនុរដ្ឋមន្ត្រីការបរទេសរុស្សី លោក Sergey Ryabkov បាននិយាយថា CFE “បានដាច់ទំនាក់ទំនងនឹងការពិតជាយូរណាស់មកហើយ” ហើយ “មិនមានប្រសិទ្ធភាពអស់រយៈពេលជាច្រើនឆ្នាំ” ។ ដូច្នេះហើយ ការដកខ្លួនរបស់រុស្ស៊ីចេញពី CFE នឹងមិនប៉ះពាល់ដល់សន្តិសុខក្នុងតំបន់ ដែលត្រូវបានបំផ្លាញដោយប្រទេសណាតូរួចទៅហើយ៕ប្រភពReuters
