សម្តេចធិបតីហ៊ុន ម៉ាណែត៖ការវិនិយោគរបស់ចិនក្រោមBRI រួមចំណែកដល់ការអភិវឌ្ឍន៍សេដ្ឋកិច្ចសង្គមរបស់កម្ពុជា

ក្នុងសារអបអរសាទរក្នុងឱកាសគម្រប់ខួបលើកទី១នៃផ្លូវល្បឿនលឿនភ្នំពេញ-ក្រុងព្រះសីហនុ ចុះថ្ងៃទី៦ខែវិច្ឆិកាសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានលើកឡើងថាផ្លូវល្បឿនលឿនភ្នំពេញ-ក្រុងព្រះសីហនុបានជំរុញវិស័យទេសចរណ៍និងកំណើនសេដ្ឋកិច្ចនិងការកាត់បន្ថយភាពក្រីក្រនៅកម្ពុជា។

សម្តេចធិបតី ហ៊ុន ម៉ាណែត បានគូសបញ្ជាក់ថា “ផ្លូវល្បឿនលឿននេះទទួលបានការកោតសរសើរពីអ្នកដំណើរចំពោះការសន្សំសំចៃពេលវេលា ភាពងាយស្រួល និងសុវត្ថិភាព”។

សម្តេចបានមានប្រសាសន៍ថា“ផ្លូវល្បឿនលឿននេះបាននឹងកំពុងដើរតួនាទីយ៉ាងសំខាន់ក្នុងការលើកកម្ពស់ប្រសិទ្ធភាពនៃការធ្វើដំណើររបស់ប្រជាពលរដ្ឋដោយជួយបញ្ចៀសការកកស្ទះចរាចរណ៍និងកាត់បន្ថយរយៈពេលធ្វើដំណើរមកនៅត្រឹមតែប្រហែល២ម៉ោងប៉ុណ្ណោះ”។សម្តេចបានបន្តថា ជាមួយនឹងផ្លូវល្បឿនលឿននេះប្រជាពលរដ្ឋរីករាយនឹងការធ្វើដំណើរពីភ្នំពេញទៅកាន់កំពង់ផែក្រុងព្រះសីហនុនៅពេលព្រឹកហើយត្រឡប់មករាជធានីភ្នំពេញវិញនៅពេលល្ងាច។សម្តេចធិបតីបានមានប្រសាសន៍ទៀតថា “លើសពីនេះ ផ្លូវល្បឿនលឿនមិនត្រឹមតែផ្តល់ភាពងាយស្រួល និងកាត់បន្ថយពេលវេលាធ្វើដំណើរប៉ុណ្ណោះទេ។ប៉ុន្តែថែមទាំងក្លាយជាសរសៃឈាមសេដ្ឋកិច្ចថ្មីមួយ ដើម្បីបម្រើដល់ការដឹកជញ្ជូន និងការតភ្ជាប់ផងដែរ”។សម្តេចបានលើកឡើងថា ផ្លូវល្បឿនលឿននេះបានតភ្ជាប់ប៉ូលសេដ្ឋកិច្ចទី១ នៃរាជធានីភ្នំពេញ ទៅនឹងប៉ូលសេដ្ឋកិច្ចទី២ នៃក្រុងព្រះសីហនុ ដែលកំពុងត្រូវបានអភិវឌ្ឍទៅជា “តំបន់សេដ្ឋកិច្ចពិសេសពហុបំណងគំរូ”។

សម្តេចបានមានប្រសាសន៍បន្តថា ផ្លូវល្បឿនលឿនភ្នំពេញ-ក្រុងព្រះសីហនុ គឺជាគម្រោងដ៏សំខាន់មួយ ដែលស្ថិតក្រោមគំនិតផ្តួចផ្តើមខ្សែក្រវ៉ាត់ និងផ្លូវ (BRI) របស់ប្រទេសចិន។សម្តេចអះអាងថា “ការវិនិយោគរបស់ក្រុមហ៊ុនចិន ក្នុងការអភិវឌ្ឍន៍ផ្លូវល្បឿនលឿនបានបង្ហាញពីអត្ថប្រយោជន៍ជាក់ស្តែង ដែលកម្ពុជាទទួលបានពីBRIនិងកិច្ចសហប្រតិបត្តិការមិត្តភាពដែកថែបដែលមានតម្លៃមិនអាចកាត់ថ្លៃបានរវាងកម្ពុជានិងចិន”។ផ្តួចផ្តើមគំនិតដោយប្រធានាធិបតីចិន Xi Jinping BRI គឺជាយុទ្ធសាស្ត្រអភិវឌ្ឍន៍ហេដ្ឋារចនាសម្ព័ន្ធសកលដែលត្រូវបានអនុម័តដោយរដ្ឋាភិបាលចិនក្នុងឆ្នាំ២០១៥ដើម្បីវិនិយោគនៅក្នុងប្រទេសជាង១៥០ និងអង្គការអន្តរជាតិ៕