ការរញ្ជួយដីដែលបានកើតឡើងនៅក្នុងខេត្តKarnaliរបស់ប្រទេសនេប៉ាល់បានសម្លាប់មនុស្សយ៉ាងហោចណាស់១៥៧នាក់និង១៧០នាក់ផ្សេងទៀតបានរងរបួស។
យោងតាមCNNគិតត្រឹមថ្ងៃទី៤ខែវិច្ឆិកាមនុស្សយ៉ាងហោចណាស់១៥៧នាក់បានស្លាប់នៅក្នុងការរញ្ជួយដីនៅប្រទេសនេប៉ាល់។ចំនួនអ្នករបួសមានប្រហែល១៧០នាក់ រួមនឹងផ្ទះរាប់រយខ្នងត្រូវបានបំផ្លាញ។”យើងកំពុងផ្តោតលើការស្វែងរកនិងជួយសង្គ្រោះ។ ដូច្នេះហើយ វាមិនអាចប៉ាន់ស្មានបានច្បាស់លាស់អំពីចំនួនផ្ទះដែលដួលរលំ ឬខូចខាតនិងហេដ្ឋារចនាសម្ព័ន្ធនោះទេ។ ទោះបីជាយ៉ាងណាក៏ដោយ ភូមិមួយចំនួនត្រូវបានបំផ្លាញរហូតដល់៩០%” ។
នេះតាមលោក Kuber Kadayat អ្នកនាំពាក្យប៉ូលីស។នៅព្រឹកថ្ងៃទី៤ ខែវិច្ឆិកា នាយករដ្ឋមន្ត្រីនេប៉ាល់ លោក Pushpa Kamal Dahal បានចុះផ្ទាល់ទៅកាន់តំបន់រងគ្រោះដើម្បីត្រួតពិនិត្យការងារជួយសង្គ្រោះ។ កិច្ចខិតខំប្រឹងប្រែងស្វែងរកកំពុងប្រឈមមុខនឹងការលំបាក ដោយសារការបាក់ដីបិទផ្លូវហើយឧបករណ៍ទំនាក់ទំនងមិនអាចទាក់ទងបានដោយសារតែដីមានការលំបាក។មន្ត្រីនេប៉ាល់បាននិយាយថា ការរញ្ជួយដីដែលបានកើតឡើងនៅក្នុងខេត្ត Karnali កាលពីថ្ងៃទី៣ខែវិច្ឆិកា គឺជាគ្រោះរញ្ជួយដីដ៏សាហាវបំផុតនៅក្នុងប្រទេសចាប់តាំងពីឆ្នាំ២០១៥មក។
មន្រ្តីគ្រោះមហន្តរាយនេប៉ាល់បាននិយាយថា គ្រោះរញ្ជួយដីនេះមានកម្រិត ៦.៤រិចទ័រខណៈដែលអ្នកអង្កេតភូគព្ភសាស្ត្រអាមេរិកបានកំណត់ពីការរញ្ជួយដីអាំងតង់ស៊ីតេ៥.៦ រិចទ័រ។គ្រោះរញ្ជួយដីនៅនេប៉ាល់បានរាលដាលដល់រដ្ឋធានីញូវដេលីរបស់ឥណ្ឌា។
នាយករដ្ឋមន្ត្រីNarendraModiបានផ្ញើសាររំលែកទុក្ខដល់ក្រុមគ្រួសារជនរងគ្រោះ ដោយបញ្ជាក់ថា ឥណ្ឌាឈរក្នុងសាមគ្គីភាពជាមួយនេប៉ាល់ ហើយត្រៀមខ្លួនជាស្រេចដើម្បីជួយតាមសមត្ថភាពរបស់ខ្លួន៕
