ជាងមួយខែបានកន្លងផុតទៅចាប់តាំងពីសវនាការចុងក្រោយនៅក្នុងការកាត់ក្តីចោទប្រកាន់ប្រធានាធិបតីYoon Suk-yeol ហើយតុលាការធម្មនុញ្ញកូរ៉េខាងត្បូងមិនទាន់កំណត់កាលបរិច្ឆេទសម្រាប់សាលក្រមរបស់ខ្លួន។ការពន្យារពេលនេះបានបង្កឱ្យមានការរំពឹងទុក ជាពិសេសចាប់តាំងពីតុលាការដំបូងបានសន្យាថានឹងធ្វើការសម្រេចចិត្តយ៉ាងឆាប់រហ័ស។ នេះបើយោងតាមកាសែត Korea Times ។
ប្រសិនបើតុលាការមិនចេញសេចក្តីសម្រេចនៅថ្ងៃទី២៩ខែមីនា វាទំនងជាថាសំណុំរឿងនេះនឹងត្រូវពន្យារពេលរហូតដល់ចុងខែ ឬអាចបន្តរហូតដល់ខែមេសា។
កាលវិភាគសម្រាប់សវនាការលើការចោទប្រកាន់របស់ប្រធានាធិបតី Yoon Suk-yeol គឺខុសគ្នាយ៉ាងខ្លាំងពីករណីឆ្នាំ២០០៤របស់អតីតប្រធានាធិបតី Roh Moo-hyun នៅពេលដែលសាលក្រមត្រូវបានប្រកាស១៤ ថ្ងៃបន្ទាប់ពីសវនាការចុងក្រោយ។ ក្នុងសំណុំរឿងលោកស្រី Park Geun-hye ឆ្នាំ ២០១៧ តុលាការបានចេញសាលក្រមក្រោយរយៈពេល ១១ថ្ងៃ។ ទោះជាយ៉ាងណា ការពិភាក្សាក្នុងរឿងក្តីរបស់លោកប្រធានាធិបតី Yoon បានចំណាយពេលយូរជាងពីរដង។
ដំបូងឡើយក្រុមអ្នកសង្កេតការណ៍បានព្យាករណ៍ថាសាលក្រមនឹងមកដល់នៅពាក់កណ្តាលខែមីនា ដោយផ្អែកលើរយៈពេលពីរសប្តាហ៍ បន្ទាប់ពីសវនាការចុងក្រោយបានបញ្ចប់ស្រដៀងទៅនឹងការចោទប្រកាន់ពីមុនរបស់មេដឹកនាំរដ្ឋាភិបាល។ទោះយ៉ាងណាក៏ដោយ ទាំងការព្យាករណ៍ដំបូងនិងការរំពឹងទុកនៅពេលក្រោយអំពីកាលបរិច្ឆេទវិនិច្ឆ័យគឺមិនត្រឹមត្រូវទេ។ អ្នកជំនាញច្បាប់និយាយថា មូលហេតុចម្បងនៃការពន្យារពេលនេះ គឺដោយសារចៅក្រមមិនយល់ស្របលើបញ្ហាច្បាប់សំខាន់ៗ។អាស្រ័យហេតុនេះចៅក្រមចង់សម្រេចបាននូវកម្រិតខ្ពស់បំផុតនៃការឯកភាពគ្នាដើម្បីកាត់បន្ថយបញ្ហាប្រឈមដែលអាចកើតមានចំពោះការវិនិច្ឆ័យ និងការបែកបាក់ដែលសាលក្រមអាចបណ្តាលឱ្យមាន។យោងតាមមនុស្សដែលដឹងពីបញ្ហាផ្លូវច្បាប់ចៅក្រមតុលាការធម្មនុញ្ញបានពិភាក្សាលើសំណុំរឿងនេះជារៀងរាល់ថ្ងៃ សូម្បីតែនៅចុងសប្តាហ៍ក៏ដោយ ចាប់តាំងពីសវនាការចុងក្រោយនៅថ្ងៃទី២៥ខែកុម្ភៈ៕
