ប្រធានាធិបតីVladimir Putinបាននិយាយថារុស្ស៊ីនិងសហរដ្ឋអាមេរិក ឥឡូវនេះបានត្រៀមខ្លួនជាស្រេចដើម្បីបង្កើតទំនាក់ទំនងសហប្រតិបត្តិការឡើងវិញ។ក្នុងប៉ុន្មានថ្ងៃថ្មីៗនេះ រដ្ឋបាលរបស់ប្រធានាធិបតី Donald Trumpបានធ្វើការផ្លាស់ប្តូរគោលនយោបាយការបរទេសរបស់សហរដ្ឋអាមេរិកចំពោះរុស្ស៊ីនិងអ៊ុយក្រែន។តាមនោះមន្ត្រីការទូតរុស្ស៊ីនិងអាមេរិកបានបន្តទំនាក់ទំនងទ្វេភាគីកម្រិតខ្ពស់ឡើងវិញតាមរយៈកិច្ចពិភាក្សានៅទីក្រុងរីយ៉ាដប្រទេសអារ៉ាប៊ីសាអូឌីតនៅថ្ងៃទី១៨ ខែកុម្ភៈ និងនៅទីក្រុងអ៊ីស្តង់ប៊ុល ប្រទេសតួកគី នៅថ្ងៃទី២៧ ខែកុម្ភៈ។
នៅឯកិច្ចប្រជុំនៃសេវាសន្តិសុខសហព័ន្ធរុស្ស៊ី (FSB) នៅថ្ងៃទី២៧ ខែកុម្ភៈ ប្រធានាធិបតីPutinបានពណ៌នាទំនាក់ទំនងដំបូងរវាងរុស្ស៊ី និងអាមេរិកថាជា”ការបង្ហាញពីក្តីសង្ឃឹមជាក់លាក់”។
ទីភ្នាក់ងារសារព័ត៌មានTassបានដកស្រង់សម្តីលោកPutinថា”យើងទាំងអស់គ្នាឃើញថាពិភពលោកកំពុងផ្លាស់ប្តូរយ៉ាងឆាប់រហ័ស។ក្នុងន័យនេះ ខ្ញុំចង់និយាយថាទំនាក់ទំនងដំបូងជាមួយរដ្ឋបាលសហរដ្ឋអាមេរិកបានបង្កើនក្តីសង្ឃឹមមួយចំនួន”។មេដឹកនាំរុស្ស៊ីរូបនេះបានបន្ថែមថា “ភាគីទាំងពីរចង់ធ្វើការឆ្ពោះទៅរកការស្តារទំនាក់ទំនងទ្វេភាគីឡើងវិញ ដោយដោះស្រាយបណ្តើរៗនូវបញ្ហាប្រព័ន្ធនិងយុទ្ធសាស្ត្រមួយចំនួនធំដែលប្រមូលផ្តុំនៅក្នុងរចនាសម្ព័ន្ធពិភពលោក”។លោកPutinបានសង្កត់ធ្ងន់ថា “ទាំងនេះគឺជាបញ្ហាដែលបណ្តាលឱ្យមានវិបត្តិនៅអ៊ុយក្រែននិងតំបន់” ។ទីភ្នាក់ងារសារព័ត៌មាន RT បានបន្ថែមថា មេដឹកនាំវិមានក្រឹមឡាំងបានចោទប្រកាន់ប្រទេសលោកខាងលិចមួយចំនួនថាមិនសប្បាយចិត្តចំពោះការស្តារទំនាក់ទំនងរុស្ស៊ី-អាមេរិកហើយចង់ “បង្កើតអស្ថិរភាពនៅក្នុងពិភពលោក”។លោកPutinបាននិយាយថា “កងកម្លាំងទាំងនេះនឹងព្យាយាមបង្អាក់ឬធ្វើឱ្យខូចដល់កិច្ចសន្ទនានៅពេលចាប់ផ្តើមដំបូង។យើងត្រូវគិតគូរពីចំណុចនោះ ហើយប្រើវិធានការការទូត និងចារកម្មទាំងអស់ដើម្បីបង្អាក់ការប៉ុនប៉ងបែបនេះ”។យោងទៅតាមលោកការដឹកនាំរបស់សហរដ្ឋអាមេរិកហាក់ដូចជាកំពុងបង្ហាញពី “ការអនុវត្តជាក់ស្តែង”និង”ទិដ្ឋភាពជាក់ស្តែងនៃអ្វីៗ” ដោយបដិសេធនូវគំរូជាច្រើននិង”រឿងមិនល្អរបស់អ្នកកាន់តំណែងមុនរបស់ពួកគេ”ដែលរួមចំណែកដល់ការដួលរលំនៃទំនាក់ទំនងទ្វេភាគី។
អ៊ុយក្រែនមិនត្រូវបានអញ្ជើញឱ្យចូលរួមកិច្ចពិភាក្សាក្នុងប្រទេសអារ៉ាប៊ីសាអូឌីតទេដោយបានបង្កើនការព្រួយបារម្ភថារដ្ឋបាលលោក Trumpចង់ដកខ្លួនចេញពីក្រុងគៀវ។ទន្ទឹមនឹងនោះកិច្ចចរចារុស្ស៊ី-អាមេរិកនៅទីក្រុងអ៊ីស្តង់ប៊ុល ត្រូវបានគេនិយាយថាផ្តោតលើសកម្មភាពរបស់ស្ថានទូតនៃប្រទេសទាំងពីរនិងមិនពាក់ព័ន្ធនឹងជម្លោះរុស្ស៊ី-អ៊ុយក្រែនឡើយ។សម្រាប់ផ្នែក ប្រធានាធិបតី Volodymyr Zelensky បាននិយាយថា លោកចង់ឱ្យសម្ព័ន្ធមិត្តអឺរ៉ុបចូលរួមក្នុងការចរចាសន្តិភាព។ក្រុងគៀវក៏បានសង្កត់ធ្ងន់ថាមិនគួរមានការចរចាអំពីអ៊ុយក្រែនឬការពិភាក្សាបញ្ចប់ជម្លោះនៅអ៊ុយក្រែនឡើយ បើគ្មានការចូលរួមពីអ៊ុយក្រែន។ទន្ទឹមនឹងនោះ លោកKeithKelloggបេសកជនពិសេសរបស់សហរដ្ឋអាមេរិកទទួលបន្ទុកអ៊ុយក្រែននិងរុស្ស៊ីបាននិយាយថាអឺរ៉ុបនឹងមិនចូលរួមដោយផ្ទាល់ក្នុងការចរចាដើម្បីបញ្ចប់ជម្លោះរុស្ស៊ី-អ៊ុយក្រែននោះទេ ។ប៉ុន្តែផលប្រយោជន៍របស់អឺរ៉ុបនឹងត្រូវបានពិចារណា៕ឌុំសាវ៉ុន
