មេដឹកនាំអ៊ីរ៉ង់លោកKhameneiបានអំពាវនាវឱ្យបណ្តាប្រទេសមូស្លីមបញ្ឈប់ពាណិជ្ជកម្មជាមួយអ៊ីស្រាអែលរួមទាំងការនាំចេញប្រេងដើម្បីតវ៉ាប្រឆាំងនឹងការវាយប្រហារលើតំបន់ហ្គាហ្សាស្ទ្រីប។មេដឹកនាំកំពូលរបស់អ៊ីរ៉ង់ លោក Ayatollah Ali Khamenei បាននិយាយកាលពីថ្ងៃទី១ខែវិច្ឆិកាថា “រដ្ឋាភិបាលអ៊ីស្លាមត្រូវតែប្តេជ្ញាចិត្តដើម្បីបញ្ចប់ឧក្រិដ្ឋកម្មឱ្យបានឆាប់រហ័ស។ បណ្តាប្រទេសមូស្លីមមិនគួរសហការផ្នែកសេដ្ឋកិច្ចជាមួយអ៊ីស្រាអែល” ដោយអំពាវនាវឱ្យបញ្ឈប់ការនាំចេញប្រេងនិងអាហារទៅកាន់ទីក្រុង Tel Aviv ។លោក Khamenei បានរិះគន់រដ្ឋាភិបាលលោកខាងលិចដូចជាអង់គ្លេស បារាំង និងអាមេរិកថាជាអ្នកប្រឆាំងប៉ាឡេស្ទីន។ មេដឹកនាំអ៊ីរ៉ង់បានក្រើនរំលឹកថាពិភពឥស្លាមមិនត្រូវភ្លេចអ្នកណាដែលកំពុងដាក់សម្ពាធលើប្រជាជននៅហ្គាហ្សាស្ទ្រីប។
លោកបាននិយាយថា៖ «វាមិនមែនមានតែអ៊ីស្រាអែលទេ។រដ្ឋមន្ត្រីការពារជាតិអ៊ីរ៉ង់ លោក Mohammad Reza Ashtiani ក៏បានព្រមានប្រទេសអ៊ឺរ៉ុបមួយចំនួនដែលជួយអ៊ីស្រាអែលឱ្យ “ប្រុងប្រយ័ត្នកុំធ្វើឱ្យប្រជាជនម៉ូស្លីមខឹង”។អ៊ីរ៉ង់ជាប្រទេសដែលផ្តល់ជំនួយផ្នែកហិរញ្ញវត្ថុ និងយោធាដល់ក្រុមហាម៉ាស់។ អ៊ីរ៉ង់បានសាទរការវាយប្រហាររបស់ក្រុមប្រដាប់អាវុធលើអ៊ីស្រាអែលថាបានជោគជ័យ។ ប៉ុន្តែបានបដិសេធការជាប់ពាក់ព័ន្ធ។ ប្រធានាធិបតីអ៊ីរ៉ង់លោក Ebrahim Raisi បាននិយាយថាប្រទេសនេះចាត់ទុក “ការគាំទ្រក្រុមតស៊ូជាកាតព្វកិច្ច” ។ប៉ុន្តែបានអះអាងថាក្រុមប្រដាប់អាវុធនៅក្នុងតំបន់ហ្គាហ្សាស្រ្ទីបធ្វើសកម្មភាពដោយឯករាជ្យ។សេតវិមានបានរិះគន់អ៊ីរ៉ង់ចំពោះ”ការសម្របសម្រួលយ៉ាងសកម្ម” លើការវាយប្រហាររបស់កងកម្លាំងអាមេរិកនៅមជ្ឈិមបូព៌ា។
សហរដ្ឋអាមេរិកកាលពីចុងសប្តាហ៍មុនបានប្រកាសអំពីការដាក់ទណ្ឌកម្មថ្មីដែលផ្តោតលើបណ្តាញផ្តល់មូលនិធិរបស់ក្រុមហាម៉ាស់និងប្រភពនៃការគាំទ្ររបស់ខ្លួននៅក្នុងប្រទេសអ៊ីរ៉ង់។កាលពីថ្ងៃទី៧ ខែតុលា កងកម្លាំងប្រដាប់អាវុធ ហាម៉ាស់ ស្រាប់តែវាយប្រហារលើទឹកដីអ៊ីស្រាអែល ដោយបានសម្លាប់មនុស្ស ១៤០០នាក់ ដែលភាគច្រើនជាជនស៊ីវិល។ អ៊ីស្រាអែលបានឆ្លើយតបនឹងការវាយប្រហារតាមអាកាសជាបន្តបន្ទាប់ ហើយក្នុងប៉ុន្មានថ្ងៃថ្មីៗនេះបានដាក់ពង្រាយទ័ពជើងគោកទៅកាន់តំបន់ ហ្គាហ្សាស្រ្ទីប។ ប៉ុន្តែមិនទាន់បានបើកការវាយប្រហារពេញលេញនៅឡើយទេ។ មន្ត្រីសុខាភិបាលនៅតំបន់ហ្គាហ្សាស្ទ្រីប បាននិយាយថា មនុស្សជាង ៨.៧០០នាក់បានស្លាប់ដោយសារការវាយប្រហារ ពីរភាគបីនៃពួកគេជាស្ត្រី និងកុមារ៕ប្រភព AFP
