កម្ពុជា និងទីភ្នាក់ងារសហប្រតិបត្តិការអន្តរជាតិជប៉ុន (JICA) បានបញ្ជាក់ជាថ្មីនូវការប្ដេជ្ញាចិត្តរួមគ្នា ក្នុងការបង្កើនកិច្ចសហប្រតិបត្តិការ និងភាពជាដៃគូ សម្រាប់ការអភិវឌ្ឍប្រកបដោយចីរភាព និងបរិយាប័ន្ន ហើយកម្ពុជា ក៏បានស្នើសម្រាប់ការគាំទ្រជាបន្តបន្ទាប់ពី JICA នៅក្នុងវិស័យអាទិភាពសំខាន់ចំនួន២ទៀតផងដែរ។
ការប្តេជ្ញាចិត្តនេះ ត្រូវបានធ្វើឡើង នៅពេល លោក ជុំ សុន្ទរី ឯកអគ្គរាជទូតតែងតាំងនៃព្រះរាជាណាចក្រកម្ពុជាប្រចាំប្រទេសជប៉ុន បានចូលជួបសម្ដែងការគួរសមជាមួយលោកបណ្ឌិត តាណាកា អាគិហិក ប្រធានទីភ្នាក់ងារសហប្រតិបត្តិការអន្តរជាតិជប៉ុន នៅទីស្នាក់ការកណ្ដាល JICA ក្នុងទីក្រុងតូក្យូ កាលពីថ្ងៃទី២៣ ខែមេសា ឆ្នាំ២០២៦។
តាមសេចក្តីប្រកាសព័ត៌មានរបស់ស្ថានឯករាជទូតកម្ពុជាប្រចាំប្រទេសជប៉ុន បានឱ្យដឹងថា នៅក្នុងកិច្ចប្រជុំនេះ លោក ជុំ សុន្ទរី បានកោតសរសើរចំពោះភាពជាដៃគូយូរអង្វែង និងដ៏មានតម្លៃបំផុតរបស់ JICA ជាមួយប្រទេសកម្ពុជា ដោយ JICA បានរួមចំណែកយ៉ាងសំខាន់ចំពោះការអភិវឌ្ឍសេដ្ឋកិច្ចសង្គមរបស់ប្រទេសកម្ពុជា ជាពិសេសនៅក្នុងវិស័យសំខាន់ៗ ដូចជា ការអភិវឌ្ឍ ហេដ្ឋារចនាសម្ព័ន្ធ ការកសាងសមត្ថភាពធនធានមនុស្ស និងភាពធន់នឹងគ្រោះមហន្តរាយ។
ចំពោះកិច្ចខិតខំប្រឹងប្រែងទាំងនេះ បានដើរតួនាទីយ៉ាងសំខាន់ក្នុងការគាំទ្រដល់ការអភិវឌ្ឍ និងការធ្វើសមាហរណកម្មក្នុងតំបន់របស់ប្រទេសកម្ពុជា ហើយជាមួយគ្នានោះ លោក ជុំ សុន្ទរី បានគូសបញ្ជាក់ «ពីអាទិភាពអភិវឌ្ឍន៍របស់ប្រទេសកម្ពុជា ដោយសង្កត់ធ្ងន់លើកំណើនប្រកបដោយចីរភាព ការធ្វើពិពិធកម្មសេដ្ឋកិច្ច ការអភិវឌ្ឍធនធានមនុស្ស ភាពធន់នឹងអាកាសធាតុ និងបរិវត្តកម្មឌីជីថល»។
នៅក្នុងបរិបទនេះ លោក ជុំ សុន្ទរី បានបង្ហាញពីសំណើរបស់ប្រទេសកម្ពុជា សម្រាប់ការគាំទ្រជាបន្តបន្ទាប់ពី JICA នៅក្នុង វិស័យអាទិភាពសំខាន់២ គឺទី១ ហេដ្ឋារចនាសម្ព័ន្ធយុទ្ធសាស្ត្រ និងការតភ្ជាប់ រួមទាំងការពង្រីកកំពង់ផែស្វយ័ត ក្រុងព្រះសីហនុ ឱ្យក្លាយជាមជ្ឈមណ្ឌលភស្តុភារកម្មក្នុងតំបន់ ការអភិវឌ្ឍប្រព័ន្ធផ្គត់ផ្គង់ទឹក និងបញ្ជូនថាមពលក្នុងរាជធានីភ្នំពញ និងទីក្រុងសំខាន់ៗ និងការពង្រីកការតភ្ជាប់ក្នុងតំបន់នៅតាមច្រករបៀងសេដ្ឋកិច្ចភាគខាងត្បូង ដើម្បីសម្រួលដល់ពាណិជ្ជកម្ម ការវិនិយោគ និងការផ្លាស់ប្តូររវាងប្រជាជននិងប្រជាជន នៅទូទាំងអនុតំបន់មេគង្គ។
ចំណែកទី២ ក្នុងការអភិវឌ្ឍធនធានមនុស្ស និងការផ្លាស់ប្តូររវាងប្រជាជននិងប្រជាជន រួមទាំងការពង្រីកអាហារូបករណ៍ក្រោមកម្មវិធី JDS (ជំនួយឥតសំណងជប៉ុនសម្រាប់ការអភិវឌ្ឍធនធានមនុស្ស) ការបណ្ដុះបណ្ដាលបច្ចេកទេស ភាពជាដៃគូសា្ថប័ន និងការកសាងសមត្ថភាព ហើយនិងការបន្តចូលរួមរបស់អ្នកស្ម័គ្រចិត្ត JICA ដើម្បីរួមចំណែកដល់ការអភិវឌ្ឍជនបទ ក៏ដូចជាដើម្បីពង្រឹងចំណងមិត្តភាពរវាងប្រជាជននិងប្រជាជន។
លើសពីនេះ លោក ជុំ សុន្ទរី បានសម្តែងចំណាប់អារម្មណ៍របស់កម្ពុជា «ក្នុងការពង្រឹងកិច្ចសហប្រតិបត្តិការជាមួយ JICA ក្នុងគំនិតផ្ដួចផ្ដើមបរិវត្តកម្មឌីជីថល និងសម្រេចឱ្យបាននូវគោលដៅនៃប្រទេសកម្ពុជា ដែលគ្មានមីននៅឆ្នាំ២០៣០» ហើយភាគីទាំង២ បានផ្លាស់ប្តូរទស្សនៈលើកិច្ចសហប្រតិបត្តិការក្នុងវិស័យមួយចំនួនទៀត និងបានបញ្ជាក់ជាថ្មីនូវការប្ដេជ្ញាចិត្តរួមគ្នា ក្នុងការបង្កើនកិច្ចសហប្រតិបត្តិការ និងភាពជាដៃគូសម្រាប់ការអភិវឌ្ឍប្រកបដោយចីរភាព និងបរិយាប័ន្ន៕
ប្រភព៖ Postkhmer
